कोलम्बो (एजेन्सी) – श्रीलंका र बंगलादेशबीच यसै साता सम्पन्न दोश्रो टेष्टमा श्रीलंकाले बंगलादेशसंग ४ विकेटको हार व्येहोर्यो। आफ्नो दुवै इनिङ्समा ३०० रन कटाएपनि बलरहरुले सोचेअनुरूप प्रदर्शन गर्न नसकेपछि श्रीलंकाले पराजय भोगेको थियो।
हारसंगै श्रीलंकामा मिडिया र समर्थकहरुले श्रीलंका क्रिकेटको आलोचना गरिरहेका छन्। यसैबीच श्रीलंका स्थित ‘द आइल्याण्ड’ नामक एक दैनिक पत्रिकाले श्रीलंका क्रिकेटको मृत्यु भएको भन्दै श्रद्धाञ्जली अर्पण गरेको छ। पत्रिकाले ‘मार्च १९,२०१७का दिन ओभल मैदानमा मृत्युवरण गरेको श्रीलंका क्रिकेटको सम्झनामा श्रद्धाञ्जली अर्पण गर्दछौं’ भन्ने व्येहोरा सहित सूचना प्रकाशित गरेको छ।
‘द आइल्याण्ड’मा छापिएको श्रद्धाञ्जली
साथसाथै, त्यसै सूचनाको अन्त्यमा ‘पार्थिव शरीरको अन्तिम संस्कार गरेर खरानी भने बंगलादेश लगिनेछ’ भनेर पनि लेखेको छ। उक्त पत्रिकाले श्रीलंका क्रिकेटका अध्यक्ष थिलंगा सुमपिथाला र श्रीलंकाका खेल मन्त्रीले ‘श्रीलंका क्रिकेट’को लास बोकेको एक कार्टुन पनि छापेको छ।
बंगलादेशले आफ्नो १००औं टेष्ट खेलिरहँदा जित संगै श्रीलंका विरुद्धको २ टेष्टको सिरिज बराबरी गरेको हो। श्रीलंकाका पत्रिकाहरुले बंगलादेशको खेलको भने खुलेर प्रसंशा गरिरहेका छन्। एक दैनिकले भने यो श्रीलंका क्रिकेटको सबैभन्दा नाजुक घडी रहेको पनि उल्लेख गरेको छ।
