बंगलादेश (एजेन्सी) – एसीसी इमर्जिङ नेसन्स कप अन्तर्गत नेपालले सोमबारदेखि समूह चरणको खेलहरु खेल्दैछ। टेष्ट मान्यताप्राप्त पाकिस्तान र बंगलादेशको यु-२३ टोलीसंगै नेपाल र हङकङ प्रतियोगिताको समुह ‘बि’ मा रहेकानेपालले पहिलो खेलमा पाकिस्तान यु-२३ को सामना गर्नेछ।

आफ्नो ४ सिनियर खेलाडीलाई घरमै छाडेर ४ अन्क्याप्ड खेलाडी लिएर बंगलादेश प्रस्थान गरेको १५ सदस्यीय टोलीको नेतृत्व ज्ञानेन्द्र मल्लले गर्नेछन भने शरद भेषवाकरले उपकप्तानको भूमिका निर्वाह गर्दैछन। यसबाहेक विनोद भण्डारी, सागर पुन , मेहबुब अलाम , दिपेन्द्र सिंह ऐरी, सुनिल धमला , सन्दिप लामिछाने, आरिफ शेख, अभिनाश कर्ण र दिलीप नाथ टोलीमा रहेका छन्।  आसिफ शेख, भुवन कार्की, सुशन भारी र दिपेश श्रेष्ठ पनि टोलीमा समावेश गरिएका छन्।

पहिलो खेलका लागि सुरुवाती एघारको छनोटनै टाउको दुखाईको विषय बन्ने निश्चित छ। सोमपाल कामी र करण केसीको अनुपस्थितिमा अभिनाश कर्णले फास्ट बलिङको जिम्मेवारी पाउने लगभग तय छ। अनुभवी स्पिनर शक्ति गौचन र बसन्त रेग्मीको अनुपस्थितिमा सुशन भारी र भुवन कार्कीले सन्दिप लामिछानेसंग खेल्ने सम्भावना रहेको छ।

ब्याटिङमा भने नेपालले केन्याविरुद्धकै रणनीति अपनाउने सम्भावना रहेको छ। ओपनर सुनिल धमला र कप्तान ज्ञानेन्द्र मल्ल पछि सागर पुन तेश्रो नम्बरमा आउनेछन्। त्यसपछि दिपेन्द्र सिंह ऐरी, शरद भेषावकर र बिनोद भण्डारी क्रिजमा उत्रनेछन्। महबुब आलमले पनि अलराउण्डरमा आफ्नो भूमिका देखाउनेछन्।

नेपाल र पाकिस्तानको खेल नेपाली समयानुसार बिहान ८:४५ बजे सुरु हुनेछ।