काठमाडौं (हाम्रो खेलकुद)– बंगलादेशमा जारी इमर्जिङ नेसन्स कप क्रिकेटको आज आफ्नो दोस्रो खेलमा जितका लागि नेपालले २ सय ५८ रनको लक्ष्य पछ्याएको छ । टस जितेको नेपालले आयोजक बंगलादेश यू २३ लाई ब्याटिङका लागि आमन्त्रण गरेको थियो । तेस्रो ओभरमै महत्वूर्ण दुई विकेट गुमाएपछि विस्तारै सम्हालिएको प्रदर्शन गरेको बंगलादेशको युवा टोलीले निर्धारित ५० ओभरमा ९ विकेट गुमाएर २ सय ५७ रन बनाएको थियो ।
मध्यक्रमका ब्याट्सम्यान नासिर हुसेनले अविजित शतक बनाएपछि टोलीले नेपालविरुद्ध ठूलो स्कोर खडा गरेको थियो । नासिरले १ सय १५ बलमा १२ चौका र २ छक्कासाथ अविजित १ सय ९ रन बनाए ।
टोलीका कप्तान मोमिनुल हकले पनि अर्धशतक पुरा गरेको खेलमा अन्य ब्याट्सम्यानको प्रदर्शन भने उल्लेख रहेन । मोमिनुलले ७८ बलमा ७ चौकासहित ६१ रन जोडे । अबु हसन राजाले ३०, अफिफ हुसेनले १४, सैफ उडिड्नले १३ रन बनाए ।
नेपालका लागि अभिनाश कर्णले ३ ,सन्दीप लामिछानेले २ तथा महबुब आलम, दिपेन्द्र सिंह ऐरी र कप्तान ज्ञानेन्द्र मल्लले समान १ विकेट लिए ।
पाकिस्तान यू २३ सँग सोमबार भएको पहिलो खेल ६ विकेटले गुमाइसकेको नेपालका प्रतियोगिताको अघिल्लो चरण पुग्ने सम्भावना जीवत राख्न आजको खेल जित्नै पर्ने हुन्छ । पहिलो दिन बंगलादेशले पनि हङकङलाई ८ विकेटले हराएर विजयी सुरुआत गरिसकेको छ । समूह चरणको खेलपछि समूहका शीर्ष दुई टोली सेमिफाइनल पुग्नेछन् ।
पाकिस्तानविरुद्ध पहिले ब्याटिङ गरेको नेपालले ५० ओभरमा ९ विकेट गुमाउँदै १ सय ८० रन बनाएको थियो । जवाफमा पाकिस्तानले ४५.१ ओभरमा ४ विकेट गुमाउँदै जितका लागि आवश्यक रन जोडेको थियो । अर्को खेलमा ३५.१ ओभरमा हङकङलाई १ सय २५ रनमा अलआउट गरेको बंगलादेशले १६.१ ओभरमा २ विकेट गुमाएर आवश्यक रन जोडेको थियो ।
