काठमाडौं (हाम्रो खेलकुद)– नेपाली क्रिकेट टोलीले जितका साथ आज बंगलादेशमा जारी इमर्जिङ नेसन्स कप क्रिकेटको यात्रा अन्त्य गरेको छ । प्रतियोगिताबाट बहिरिइसकेका दुई टोलीबीचको प्रतिस्पर्धानमा नेपालले हङकङलाई ७ विकेटले हराएको छ । २ सय १५ रनको लक्ष्य पछ्याएको नेपालको कप्तान ज्ञानेन्द्र मल्ल, सिनियर खेलाडी शरद भेषावकर र युवा खेलाडी दीपेन्द्र सिंह ऐरीले अर्धशतक पुरा गरेपछि नेपालले ४४.२ ओभरमा मात्र ३ विकेट गुमाउँदै २ सय २० रन जोडेको थियो ।
अविजित अर्धशतक बनाएका दीपेन्द्र र शरदले चौथो विकेटका लागि १ सय ५ रनको साझेदारी गर्दै प्रतिष्ठानको लडाईका रुपमा हेरिएको खेल नेपालका पक्षमा पारेका थिए । दीपेन्द्र ६० र शरद ५५ रनमा अविजित रहे ।
त्यसअघि पार्ट टाइमर बलिङमा पनि चम्केका ओपनर ज्ञानेन्द्र र दीपेन्द्रले तेस्रो विकेटका लागि ३५ रनको साझेदारी गरेका थिए । ८२ बल खेलेका ज्ञानेन्द्रले ११ चौका साथ ७० रन बनाएका थिए । उनले गत महिना केन्याविरुद्ध विश्व क्रिकेट लिग च्याम्पियनसिपमा ७ विकेटको जितमा पनि अर्धशतक पुरा गरेका थिए ।
दीपेन्द्रले लगातार दोस्रो खेलमा अर्धशतक पुरा गरे । ८३ बल खेलेका उनले ५ चौका र १ छक्का प्रहार गरेका थिए । त्यस्तै ५१ बल खेलेका शरदले ३ चौका र त्यत्तिनै छक्का प्रहार गरे । टोलीका अर्का ओपनर आसिफ शेखले ८, दीलिप नाथले १२ रन बनाएका थिए । हङकङका लागि सुर्बमन्यमले २ र निकाक खानले १ विकेट लिए ।
त्यसअघि नेपालले टस जितेर नेपालले हङकङलाई पहिले ब्याटिङको लागि आमन्त्रण गरेका थियो । हङकङ निर्धारित ५० ओभरमा सबै विकेट गुमाएर २ सय १४ रन बनाएको छ । हङकङको आपनिङ जोडिको उत्कृष्ट सुरुआत दिलाउँदै नेपालको निर्णयलाई गलत सावित गराउने प्रयास गरेका थिए । कामेरुन म्याकुल्सन र अन्सुमन रथले पहिलो विकेटका लागि ९५ रनको साझेदारी गर्दै नेपालमाथि दबाब बढाएका थिए ।
त्यस्तो अवस्थाबाट नेपाललाई खेलमा फर्काउन पार्ट टाइमर कप्तान ज्ञानेन्द्र किफायती सावित भए । उनले दुई ओभरको फरकमा दुवै ओपनरलाई आउट गर्दै नेपाललाई खेलमा फर्काएका थिए । ज्ञानेन्द्रले विकेट लिनुअघि अन्सुमनले अर्धशतक पुरा गरेका थिए । ६० बल खेलेका उनले ७ चौकाको मद्दतमा ५१ रन बनाए । ज्ञानेन्द्रले आफ्नै बलमा अन्सुमनलाई क्याच गरे ।
७३ बलमा ४३ रन बनाएका क्यारुनले ५ चौका प्रहार गरे । वकास खानले ३०, साहिद वासिफले २२ र इशान खानले १३ रन बनाउनु बाहेक हङकङका लागि अन्य खेलाडीले दोहोरो अंकमा रन बनाउन सकेनन् । अभिनाष कर्णले ३, ज्ञानेन्द्रसँगै सुसन भारी, भूवन कार्कीले समान २ ,सन्दीप लामिछानेले समान १ विकेट लिए ।
नेपाल र हङकङ दुवैले समूह चरणका सुरुआती दुई खेल हारेका थिए । पहिलो खेल पाकिस्तान यू २३ सँग ६ विकेटले गुमाएको नेपाल दोस्रो खेलमा बंगलादेश यू २३ सँग ८३ रनले पराजित भएको थियो ।
