काठमाडौं (हाम्रो खेलकुद)– इमर्जिङ नेसन्स कप क्रिकेटअन्तर्गत समूह चरणको अन्तिम खेलमा हङकङलाई ७ विकेटले हराउँदै नेपालले यात्रा टुंगाएको छ । नेपालले सुरुआती दुई खेलमा पाकिस्तान यू २३ को खेल ६ विकेट र आयोजक बंगलादेशसँगको खेल ८३ रनको हार बेहोरेको थियो ।

तर, बिहीबार हङकङविरुद्धको २ सय १५ रनको लक्ष्य ४२.२ ओभरमा ३ विकेट गुमाउँदै पुरा गरेर नेपालले यात्राको सुखद अन्त्य गरेको छ । कप्तान ज्ञानेन्द्र मल्ल, शरद भेषावकर र दीपेन्द्र सिंह ऐरीले अर्धशतक पुरा गरेपछि नेपालका लागि सफल नतिजा निकाल्न सहज बनेको थियो । म्यान अफ दी म्याच बनेका ज्ञानेन्द्रले ७० रन बनाए भने चौथो विकेटका लागि १ सय ५ रनको साझेदारी गरेका दीपेन्द्र ६० र शरद ५५ रनमा अविजित रहे ।

त्यसअघि नेपालले टस जितेर नेपालले ब्याटिङको निम्तो दिएको हङकङले ५० ओभरमा सबै विकेट गुमाएर २ सय १४ रन बनाएको छ । नेपालका लागि अभिनाष कर्णले ३, ज्ञानेन्द्रसँगै सुसन भारी, भूवन कार्कीले समान २ विकेट लिएका थिए ।

बंगलादेशबाट नेपाली टोलीका व्यवस्थापक एवंम् टेक्निकल एनालिस्ट रमश शिवाकोटीले पठाएका तस्बिरहरु ।