धनगढी (हाम्रो खेलकुद) – धनगढी प्रिमिएर लिगको दोश्रो क्वालिफायरमा टिम चौराहा धनगढीले रुपन्देही च्यालेन्जर्सलाई ९२ रनको भारी अन्तर ले पराजित गर्दै फाइनल प्रवेश गरेको छ। पहिलो ब्याटिङ गरेको टिम चौराहा धनगढीले रुपन्देही च्यालेन्जर्ससामु १ सय ७३ रनको लक्ष्य प्रस्तुत गरेको थियो।

विशाल लक्ष्य पछ्याउन ब्याटिङमा उत्रिएको रुपन्देही ८० रनमा अलआउट भएको थियो। १५.२ ओभर मात्र टिकेको रुपन्देहीको पारीमा जम्मा ३ जना ब्याट्सम्यानले दोहोरो अंक छोए। राजेश पुलामी र कृष्ण कार्कीले सर्वाधिक १४ रन बनाएका थिए भने पुष्प थापाले १३ रन जोडे। ओपनरद्वय हरिशंकर साह ४ रन र शंकर राना ९ रनमा आउट भए। बिक्रम सोब ५, प्रकाश केसी ८ र अन्तिम थापा १ रन बनाएर पेभेलियन फर्केका थिए।

चौराहाको लागि आरीफ शेखले २ ओपनरलाई बोल्ड गरेका थिए भने सौरभ खनाल र ललित राजवंशीले समान ३/३ विकेट लिए। सुशन भारीले अन्तिम विकेट लिएका थिए।

यसअघि,कप्तान पारस खड्काको कप्तानी पारीको मद्दतले टिम चौराहा धनगढीले निर्धारित २० ओभरमा ५ विकेट गुमाऊँदै १ सय ७२ रनको योगफल खडा गरेको थियो। खड्काले ४१ बलमा अविजित ६७ रन बनाऊँदै प्रतियोगिताकै सर्वाधिक व्यक्तिगत स्कोर बनाए। ओपनर राजु रिजाल र अनिल कुमार मण्डलले राम्रो सुरुवात दिलाएर ठुलो स्कोरको लागि आधार तय गरेका थिए। मण्डलले ११ बलमा १३ रन बनाए भने राजुले २८ बलमा २५ रन जोडे। पृथु बास्कोटा र आरीफ शेख क्रमश: ४ र ७ रन बनाऊँदै आउट भएपनि कप्तान खड्काले आफ्नो तर्फबाट लगातार रन बनाइरहेका थिए।

३२ बलमा अर्धशतक पुरा गरेका पारसले आफ्नो पारीमा ६ चौका र ४ छक्का प्रहार गरेका थिए। उनले छैठौं विकेटका लागि सौरभ खनालसंग १९ बलमा अविजित ४३ रन बनाएका थिए। सौरभले ८ बलमा २ चौका र २ छक्काको मद्दतले २४ रन जोडे। अमर सिंह राउटेलाले पनि १२ बलमा ३ चौकाको सहायताले १६ रन बनाएका थिए।

रुपन्देहीका बलरहरुले राम्रो प्रदर्शन गर्न नसक्दा चौराहाका ब्याट्सम्यानले खुलेर रन बनाएका थिए। कृष्ण कार्कीले २ विकेट लिन ४० रन खर्चे भने बिक्रम भुसाल र साहब आलमले पनि १/१ विकेट लिए।

उत्कृष्ट ब्याटिङ प्रदर्शन गरेका कप्तान पारस खड्का खेलका म्यान अफ द म्याच भए। चौराहाले शनिबार हुने फाइनल खेलमा बिराटनगर किङ्सको सामना गर्नेछ।