राजकोट (एजेन्सी) – जस्प्रित बुमराहले सुपर ओभरमा उत्कृष्ट बलिङ प्रदर्शन गरेपछि इन्डियन प्रिमिएर लिग अन्तर्गत शनिबार भएको दोश्रो खेलमा मुम्बई इन्डियन्सले गुजरात लायन्सलाई सुपर ओभरमा पराजित गरेको छ।
खेलमा पहिलो ब्याटिङ गरेको गुजरातले निर्धारित २० ओभरमा ९ विकेटको नोक्सानीमा १ सय ५३ रन बनाएको थियो। गुजरातका लागि ओपनर इशान किशनले ३५ बलमा ४८ रन बनाएका थिए। रबिन्द्र जडेजाले २१ बलमा २८ रन र एन्ड्रयु टाईले १२ बलमा २५ रन जोडेपछि गुजरातले राम्रो योगफल खडा गरेको थियो। मुम्बईका लागि क्रुनाल पाण्ड्याले ३ विकेट लिए भने लासिथ मालिंगा र बुमराहले २/२ विकेट खसाले।
जवाफी ब्याटिङमा उत्रेको मुम्बईले सबै विकेट गुमाउँदै समान १ सय ५३ रन जोड्यो। ओपनर पार्थिब पटेलले ४४ बलमा ७० रन जोडेका थिए भने नितिश रानाले १६ बलमा १९ रन बनाए। बलिङमा राम्रो प्रदर्शन गरेका क्रुनालले २० बलमा २९ रन बनाए। अन्तिम बलमा रनआउट भएका उनले २ चौका र १ छक्का प्रहार गरेका थिए।
सुपर ओभरमा गुजरातका जेम्स फक्नरले २ विकेट लिएका थिए। पोलार्डले सुपर ओभरमा १० रन जोडेका थिए। जवाफमा मक्कुलम र फिन्चको जोडीले बुमराहको बलिङ खेल्न नसकेपछि मुम्बईको जित भएको थियो। बुमराहले आफ्नो सुपर ओभरमा २ एक्स्ट्रासहित जम्मा ६ रन दिए।
