हैदराबाद (हाम्रो खेलकुद) – ओपनर एवं कप्तान डेविड वार्नरले आक्रमक शतक बनाएपछि सनराइजर्स हैदराबादले कोलकाता नाइट राइडर्सलाई ४८ रनले पराजित गर्यो।
पहिलो ब्याटिङ गरेको हैदराबादले निर्धारित २० ओभरमा ३ विकेट गुमाउँदै २ सय ९ रनको योगफल खडा गरेको थियो। कप्तान वार्नरले ५९ बलमा १२६ रन बनाएका थिए। २० बलमा अर्धशतक बनाएका वार्नरले ४३ बलमा शतक पुरा गरेका थिए। हैदराबादका लागि केन विलियमसनले ४० रन जोडे भने शिखर धवनले २९ रनको योगदान दिए।
जवाफि ब्याटिङमा उत्रिएको कोलकाताले निर्धारित २०ओभर खेल्दै ७ विकेटको नोक्सानीमा १ सय ६१ रन जोड्यो। उसका लागि रोबिन उथाप्पाले २८ बलमा ५३ रन बनाएर खेलमा केहि आशा दिलाएपनि अन्य ब्याट्सम्यान नचल्दा हार व्यहोर्यो। मनिष पाण्डेले २९ बलमा ३९ रन बनाउँदै तेश्रो विकेटका लागि ७८ रनको साझेदारी गर्दै केहि प्रयास भने गरेका थिए।
हैदराबादका लागि मोहम्मद सिराज, सिद्धार्थ कल र भुवनेश्वर कुमारले २/२ विकेट लिए भने रसिद खानले युुसुफ पठानलाई पेभेलियन फर्काएका थिए। खेलको म्यान अफ द म्याच डेविड वार्नर भए।
