बेंगलोर (एजेन्सी) – इन्डियन प्रिमियर लिग अन्तर्गत बिहिबार भएको एलिमिनेटरमा कोलकाता नाइट राइडर्सले साविक विजेता सनराइजर्स हैदराबादलाई ७ विकेटले पराजित गरेको छ। जितसंगै कोलकाताले फाइनल प्रवेशका लागि दोश्रो क्वालिफायरमा मुम्बई इन्डियन्सको सामना गर्ने पक्का भएको छ।
टस जितेर फिल्डिङ रोजेको कोलकाताले उत्कृष्ट बलिङ प्रदर्शन गर्दै हैदराबादलाई १ सय २८ रनमा रोकेको थियो। ७ विकेट खसेको हैदराबादका लागि ओपनर डेवि वार्नरले सर्वाधिक ३७ रन बनाएका थिए। केन विलियमसनले २४ र विजय शंकरले २२ रन जोडेपछि हैदराबादको सय रन पुरा भएको थियो। कोलकाताका लागि नाथन कुल्टर नाइलले ३ र उमेश यादवले २ विकेट लिए।
वर्षाका कारण दोश्रो इनिङ समयमै सुरु हुन नसकेपछि कोलकाताले ६ ओभरमा ४८ रनको लक्ष्य प्राप्त गरेको थियो। १२ रनको स्थितिमा ३ विकेट गुमाएको कोलकातालाई कप्तान गौतम गम्भीरले अविजित पारी खेल्दै जित दिलाए। उनले १९ बलमा २ चौका र २ छक्का सहित ३२ रन बनाएका थिए। कोलकाताले ४ बल बाँकी रहँदै जित दर्ता गरेको थियो।
