काठमाडौँ (हाम्रो खेलकुद) – नेपाली राष्ट्रिय क्रिकेट टोलीका कप्तान पारस खड्काले मंगलबारदेखि सुरु हुने प्रधानमन्त्री कप एकदिवसीय क्रिकेट प्रतियोगितामा सहभागिता नजनाउने पक्का भएको छ।
सशस्त्र प्रहरी बल (एपीएफ) बाट घरेलु क्रिकेट खेल्दै आएका पारस हाल व्यक्तिगत कामका कारण संयुक्त राज्य अमेरिकामा रहेको जानकारी राष्ट्रिय टोलीका उपकप्तान ज्ञानेन्द्र मल्लले दिएका हुन्। खड्काको अनुपस्थितिमा ज्ञानेन्द्रले नै एपीएफको नेतृत्व गर्ने भएका छन्।
पारस नितान्त व्यक्तिगत कारणले अमेरिका पुगेको र यस प्रतियोगितामा आफु सहभागी नहुने जानकारी यसअघि नै उनले दिएको मल्लले बताए। उनि हङकङसँगको खेलका लागि भने प्रशिक्षणका लागि नेपाल फर्किने बुझिएको छ।
