बर्मिघम (एजेन्सी)–इङ्ल्यान्डमा जारी च्याम्पियन्स ट्रफीको दोस्रो खेलमा आज न्यूजिल्यान्ड र अस्ट्रेलियाबीच प्रतिस्पर्धा हुदैछ । प्रतियोगिताको पहिलो खेलमा बिहीबार इङ्ल्यान्डले बंगलादेशलाई हराएको थियो ।
जोस हाज्लेवुड , प्याट कमिन्ग्स , मिसेल स्टार्क र जेम्स प्याटिसन गरि चार फास्ट बलरहरु चोटबाट फर्किएको अस्ट्रेलिया उच्च मनोबलका साथ उत्रनेछ । तर सबै चार खेलाडीलाई एकै पटक खेलाएर जोखिम नउठाउन अस्ट्रेलियाले नलिन पनि सक्छ ।
अस्ट्रेलियाले कप्तान स्टिभ स्मिथ र डेभिड वार्नर सहितको बलियो ब्याटिङ लाइनअपमा क्रिस लिन पनि खेल्ने सम्भावना छ । लिनले कोलकाता नाइटराइडर्सबाट भारतीय क्रिकेट लिग (आइपिएल) मा उच्च प्रदर्शन गरेकै कारण उनले मौका पाउने सम्भावना बलियो देखिएको हो ।
अर्को तिर न्यूजिल्यान्डको टोलीमा टिम साउथी तथा ट्रेन्ट बल्ट जस्ता बलर छन् । इङ्ल्यान्डमा राम्रो प्रदर्शन गरेका यनी दुई बल टोलीका लागि सधै महत्वपूर्ण खेलाडी रहँदै आएका छन् ।
चार वर्षअघिको च्याम्पियन्स ट्रफीमा बर्मिघममा नै इङ्ल्यान्डसँगको खेलमा अस्ट्रेलिया निराश बन्नु परेको थियो । यसपटक अस्ट्रेलिया विजयका साथ जितको सुरुआत गर्ने लक्ष्यका साथ उत्रने तयारीमा छ ।
