एजेन्सी – अन्तर्राष्ट्रिय क्रिकेट काउन्सिल (आइसीसी)ले आयरल्याण्ड र अफगानिस्तानलाई पूर्ण सदस्यता दिंदै टेष्ट खेल्ने ११औं र १२औं राष्ट्र बनाएको छ। आयरल्याण्ड र अफगानिस्तानले आइसीसी समक्ष ‘एसोएसियट सदस्य’बाट बढुवा हुन आवेदन दिएसँगै आज भएको आइसीसी बोर्ड बैठकले सो निर्णय पारित गरेको हो।
आयरल्याण्डले सन् २००५मा ओडीआइ मान्यता प्राप्त गरेको थियो भने अफगानिस्तानले पहिलोपटक सन् २००९मा उक्त मान्यता प्राप्त गरेको थियो। आइसीसीको बोर्डले दुवै देशको अन्तर्राष्ट्रिय प्रदर्शन मात्र नहेरेर उनिहरुको घरेलु क्रिकेटको संयन्त्र र विकासलाई ध्यान दिंदै टेष्ट मान्यता दिएको हो। हाल दुवै राष्ट्रले दुइदिवसीय क्रिकेट प्रतियोगिताहरु आयोजना गरेका छन् र तिनले आइसीसीको फर्स्ट क्लास मान्यता पाएको छ।
भर्खरै सम्पन्न एकदिवसीय सिरिजमा वेष्ट इन्डिजसँग बराबरी गरेको अफगानिस्तानले विगतमा जिम्बाब्वेलाई एकदिवसीय र टि२० सिरिजमा पराजित गरेको थियो। सन् २०१६को टि२० विश्वकपमा उपाधि विजेता वेष्ट इन्डिजलाई पराजित गरेपछि अफगानिस्तानको चर्चा चुलिएको थियो।
