मुम्बई(एजेन्सी) – अघिल्लो सम्झौता भन्दा ४ गुणा बढी रकममा बोली जित्दै चाइनिज मोबाइल ब्राण्ड कम्पनी भिभोले सन् २०२२ सम्मको आइपिएलमा आफ्नो नाम जोड्ने भएको छ।

सन् २०१२मा पेप्सीले ५ बर्षे सम्झौता गरेपनि २ बर्ष बित्दै तोडेपछि भिभोदुइ वर्षकालागि आइपिएलसँग जोडिएको थियो। करिब १०० करोड भारतीय रुपैया प्रति वर्षको सम्झौतालाई चार गुणा भन्दा धेरै बढाउदै भिभोले २०१८ देखि २०२२ सम्म प्रति वर्ष ४३९.८ करोडको बोलीले जितेको हो ।

सन् २००८ मा सुरु भएको आइपिएललाई भारतको रियल इस्टेट कम्पनि डीएलएफले चार वर्ष प्रतिवर्ष ४० करोड भारुमा प्रायोजन गरेको थियो । त्यसपछि पेप्सी आइपिएल नाम दिनलाई पेप्सीले प्रतिवर्ष ७९.२ करोड तिर्ने शर्तमा ५ बर्षे सम्झौता गरेपनि २ बर्षमा उक्त सम्झौता तोडेको थियो ।

पछिल्लो पटक भन्दा कम्तिमा १५ प्रतिशत धेरै तोकिएको ‘बेस प्राइस’ भन्दा धेरै बढीमा आइपिएलको नामकरण अधिकार भिभोले खरिद गरेको हो । भिभोको प्रतिस्पर्धामा भारतीय क्रिकेट टोलीलाई प्रायोजन गरेको ओप्पो मोबाइल फोनको ब्राण्डले बोली लगाएको थियो । ओप्पोले पाच वर्षमा १ हजार ४ सय ३० करोडको बोली लगाएको थियो । भिभोले भने ५ वर्षको लागी कुल २ हजार १ सय ९९ करोडको बोली लगाएको हो। यो बोली पछिल्लो पटक तिरिएको रकम भन्दा ५ सय ५४ प्रतिशतले वृद्धि भएको छ। ओप्पो र भिभो बाहेक जियोमी र इन्टेक्सले सम्झौतामा चासो देखाएपनि कुनै आधिकारिक बोलि भने लगाएनन ।