काठमाडौं (हाम्रो खेलकुद)– अन्तर्राष्ट्रिय क्रिकेट परिषद् (आइसीसी) को निलम्बन खेपिरहेको नेपाल क्रिकेट संघ (क्यान) को प्रस्तावित विधानमा लगभग सहमति जुटेको छ । आइसिसी प्रतिनिधि मण्डल र क्रिकेट विवाद समाधानका लागि गठित सल्लाहकार समितिको शनिबार दिउँसो ३ बजेपछि झन्डै तीन घन्टा राजधानीको एक पाँचतारे होटलमा चलेको बैठकमा सहमति जुटेको श्रोतले बताएको छ ।

सल्लाकार समितिले तयार पारेर झन्डै दुई महिनाअघि आइसिसीमा पठाएको क्यानको प्रस्तावित विधानमा समिति भित्रै एकमत हुन नसकेपछि थप छलफलका लागि आइसिसी प्रतिनिधि मण्डल शुक्रबार काठमाडौं आएको थियो । ‘प्रस्तावित विधानमा धेरै विषयमा सहमति थियो । त्यसमा केही असहमति र फरकमत थिए’ राष्ट्रिय खेलकुद परिषद् (राखेप) बाट समितिको सदस्यमा रहेका रोहित दाहालले भने,‘मुख्यतः तीनै विवादित विषयमा छलफल केन्द्रित भयो र एकहद सम्म सहमति बनेको छ ।’

आइसीसीका उपाध्यक्ष इमरान ख्वाजा र फाइनान्स मेनेजर अमर शेखको उपस्थिति भएको बैठकमा सल्लाहकार समितिका ८ मध्ये ६ जनाको उपस्थिति थियो । समितिका सल्लाकार मध्येका एक विनयराज पाण्डे, राखेपका प्रेस सल्लाकार दाहाल,निर्वाचित क्यानका अध्यक्ष चतुरबहादुर चन्द, महासचिव अशोकनाथ प्याकुरेल, राखेपबाट तदर्थ क्यानको महासचिव पवन अग्रवाल र युवा तथा खेलकुद मन्त्रालयले तत्कालिन समयमा तोकेका सह सचिव चुडामणी पौडेल बैठकमा उपस्थित थिए । समितिका अर्का सल्लाकार बसन्त चौधरी अस्वस्थताका कारण बैठकमा उपस्थित भएनन् भने अर्का सदस्य दीपक कोइराला लामो समयदेखि बैठकमा अनुपस्थित रहँदै आएका छन् ।

क्यानको साधारण सभामा भाग लिने प्रतिनिधि संख्याका विषयमा समितिमा मुख्य विवाद थियो । निर्वाचित क्यानका प्रतिनिधिले राखेको प्रस्ताव बमोजिम नै संख्यामा सहमति भएपछि अब क्यानको साधारण सभामा ६० जनाको सहभागिता रहने श्रोतले बताएको छ । हरेक जिल्लाबाट अब १ जना प्रनिनिधिले भाग लिने पाउने गरि सहमति बनेको छ । त्यस्तै प्रदेशबाट २ जिल्ला बराबर १ प्रतिनिधि तथा विभिन्न तीन उपसमितिका समान १ एक जना गरि ६० जनाको साधारण सभामा उपस्थिति ग्यारेन्टी गरिएको बताइएको छ ।

क्यानको सदस्य जिल्ला ३८ बाट ३८, ७ प्रदेशको प्रतिनिधित्व हुने गरि प्रत्येक २ जिल्लाबाट १ जनाको दरले १९ जना तथा अम्पायर, प्रशिक्षक र पूर्व खेलाडी समितिबाट एक एक गरि ३ जनाले साधारण सभाको मताधिकार प्राप्त गर्ने सहमति भएको छ । श्रोतका अनुसार प्रतिनिधिको संख्यामा १/२ तलमाथि हुन सक्छ ।

आइसिसीमा पठाएको विधानमा हरेक दुई जिल्लाबाट १ जनाको प्रतिनिधित्व हुने थियो । त्यसमा निर्वाचित क्यानका प्रतिनिधिले फरकमत राखेका थिए । संख्या बढाउने पर्ने निर्वाचित क्यानको प्रस्तावमा सहमति जुटेको छ । निर्वाचित समितिकै अर्को प्रस्ताव निर्वाचित कार्यसमिति, तदर्थ समिति र सल्लाकार समितिलाई पनि साधारण सभामा भाग लिन दिनु पर्ने प्रस्तावमा भने सहमति जुट्न सकेन । अहिले विवादमा रहेका कुनै पनि व्यक्तिले स्वतः साधारण सभामा भाग लिन नपाउने भएका छन् ।

क्यानको प्रस्तावित विधान भने अहिलेकै विधमान साधारण सभाले पास गर्नु पर्ने र त्यसका लागि समितिका अध्यक्ष चन्द र महासचिव प्याकुरेललाई एक महिनाको समय तोकिएको श्रोतले बताएको छ । ‘क्यानको प्रस्तावित विधानलाई निर्वाचित क्यानले विशेष साधारण सभा बोलाएर पास गराउनु पर्नेछ ’ श्रोतले भन्यो, ‘त्यो विधान पास हुन सकेन भने त्यो नेपालका लागि दुर्भाग्य हुनेछ र हामी अर्को विवादको भुमरीमा पर्न सक्छौं । त्यसपछि आइसिसीले हामीले नसोचेको कदम चाल्न सक्छ ।’

क्यानको केन्द्रिय कार्यसमितिकिो संख्या १७ सदस्यीय हुनेछ । विशेष साधारण सभाले क्यानको विधान पास गरेपछि जतिसक्दो छिटोको क्यानको निर्वाचन गर्नेमा बैठकमा सहमति भएको बताइएको छ । निर्वाचनका लागि ५ सदस्यीय समिति बन्ने र समितिमा रहनेले क्यानको निर्वाचनमा प्रतिस्पर्धा गर्न नपाउने पनि बैठकमा सहमति भएको बताइएको छ ।

सल्लाहकार समितिसँग बैठक बस्नुअघि आइसिसीको प्रतिनिधि मण्डलले निर्वाचत क्यानका प्रतिनिधिलाई भेट गरेको थियो।
शनिबार भएको सहमतिलाई गोप्य राख्ने र आइसिसी प्रतिनिधि मण्डलले सहमतिलाई आइतबार प्रेस विज्ञप्तीमार्फत सार्वजनिक गर्ने सम्भावना रहेको बताइएको छ ।

क्यानको दोहोरो संरचना खडा भएपनि गत बर्षको सुरुआतमा आइसिसीले क्यानलाई निलम्बन गरेको थियो । पछि विवाद समाधानका लागि भन्दै आइसीसीले नेपाल सरकारको सहमतिमा सरोकारवालाहरुलाई समावेश गर्दै ८ सदस्यीय सल्लाहकार समिति गठन गरेको थियो ।