काठमाडौँ (हाम्रो खेलकुद) – आइसीसी यू१९ विश्वकपको एसिया क्षेत्रको छनोट अन्तर्गत नेपालका कप्तान सन्दिप लामिछानेले प्रतियोगिताको ‘म्यान अफ द सिरिज’को उपाधि जितेका छन्। प्रतियोगिता अवधिभर ६ खेलमा ३ पटक ५ विकेट लिएका सन्दिपले कुल २४ विकेट लिएका थिए।
प्रतियोगिताको पहिलो खेलमा आयोजक सिंगापुर विरुद्ध २१ रन खर्चेर ५ विकेट लिएका सन्दिपले दोश्रो खेलमा १७ रन खर्चिदैं ५ विकेट लिएका थिए। तेश्रो खेलमा अफगानिस्तानविरुद्ध २ विकेट हात पारेका कप्तानले आयोजकविरुद्ध चौथो खेलमा भने ४ विकेट लिए। मलेसिया विरुद्धको पाँचौ खेलमा करियरकै उत्कृष्ट प्रदर्शन गर्दै उनले १३ रन खर्चेर ७ विकेट लिए। मंगलबार भएको अन्तिम खेलमा भने उनले १ विकेटमात्र लिए। सन्दिप ५ विकेट लिएका ३ खेलमा म्यान अफ द म्याच भए।
प्रतियोगिता अवधिभरका ६ खेलमा ५३.४ ओभर बलिङ गरेका उनले २.४२को इकोनोमीमा १ सय ३० रन मात्र खर्चेका थिए। उनले ५.४१को औसतमा विकेट लिएका थिए। उनले यसक्रममा ८ मेडन फ्याँकेका थिए भने उनको स्ट्राइक रेट १३.४को रहेको थियो।
