काठमाडौं (हाम्रो खेलकुद)- नेपाली राष्ट्रिय टिमका कप्तान पारस खड्का र मेहबुब आलम सम्मिलित सिंगापुर इमर्जिङ स्टारले सिंगापुरमा जारी पाँचौ संस्करणको सिंगापुर अन्तर्राष्ट्रिय टि–२० क्रिकेट प्रतियोगितामा पहिलो जित हात पारेको छ ।

इण्डियन एसोसिएसनको खेल मैदानमा शनिबार भएको समूह चरणको दोस्रो खेलमा इमिर्जिङ स्टारले मेलवर्न क्रिकेट क्लबलाई डिएल पद्धतिमा २९ रनले पराजित गर्दै प्रतियोगितामा पहिलो जित हात पारेको हो । यसअघि नेपाली खेलाडी सम्मिलित टिम पहिलो खेलमा सिंघालेज स्पोर्टस् क्लबसँग पराजित भएको थियो ।

टस जितेर पहिले ब्याटिङ गरेको सिंगापुर इमिर्जिङले १० ओभर ब्याटिङ गर्दै ७६–४ को स्कोर बनाउदा वर्षाले खेल अबरुद्ध हुन पुगेको थियो । त्यसपछि खेल सुरु हुन नसक्दा मेलवर्नलाई १० ओभरमा ९० रनको नयाँ लक्ष्य दिएको थियो ।

९० रनको लक्ष्य पछ्याएको मेलवर्न क्रिकेट क्लब ८.२ ओभरमा अलआउट हुदै ६० रनमात्र बनाउन सक्यो । मेलवर्नका लागि मेरिक बुचाननले सर्वाधिक २१ रन बनाएपनि टिमलाई जित दिलाउन सकेन । यस्तै म्याथ्यु ब्राउनले १३ तथा ज्याक्सन कुपले १० रन बनाएपनि अन्य ब्याट्समयान चल्न नसक्दा पराजित हुन पुग्यो । मेलवर्नलाई सस्तैमा समेट्न अनन्त कृष्णले ३ विकेट लिए ।

पारस ले उत्कृस्ट बलिङ गर्दै २ ओभरमा ६ रन खर्चदै २ विकेट लिए । धर्मीचन्दमुलेवाले दुई तथा मेहबुवले एक विकेट हात पारे । यसअघि टस जितेर पहिले ब्याटिङ गरेको सिंगापुर इमर्जिङका लागि क्षितिज सिन्ड र चेतज सुर्यावंशी मान २१–२१ रनमा अविजित रहे । यस्तै नेपाली टिमका कप्तान पारस खड्काले १७ रन तथा चामिन्डा रुवनले १२ रन बनाए ।

मेलवर्नका मेरिक बुचानन र विल्सन म्याकगिलिभरेले समान २–२ विकेट लिए । समूह ‘बी’ मा पहिलो जितसँगै सिंगापुर इमर्जिङले सेमिफाइनल पुग्ने सम्भावना बलियो बनाएकबो छ । सिंगापुर इमर्जिङले आजै हुने समूह चरणको अन्तिम खेलमा हङकङको कोउलुन क्रिकेट क्लबलाई पराजित गर्न सके सेमिफाइनल पुग्नेछ । यो समूहमा सिंघालेज क्रिकेट क्लब अपराजित रहँदै सेमिफाइनलमा पुगिसकेको छ ।