मुम्बई (एजेन्सी)– घरेलु मैदानमा उच्च प्रदर्शन गर्दै आइरहेको भारतीय क्रिकेट टोलीले आज न्युजिल्यान्डविरुद्ध पहिलो एक दिवसिय खेल्दैछ । आजको दिवा रात्री खेल मुम्बईको वाङखडे मैदानमा हुँदैछ ।

 

भारतले हालै घरेलु भूमिमा भएको पाँच एक दिवसिय श्रृखंलामा अस्ट्रेलियालाई ४–१ ले हराएको थियो । त्यहि सफलतालाई निरन्तरता दिने प्रयासमा रहने भारतका लागि कप्तान विराट कोहलीको आजको खेल २ सयौं एक दिवसिय खेल पनि हो । भारतीय टोलीमा अहिले विविधापूर्ण र अन्त्यसम्म पनि ब्याटिङ गर्न सक्ने खेलाडी रहेका छन् ।

यद्दपी टोली यसपटक दुई महत्वपूर्ण स्पिनर रविचन्द्रन आश्विन र रविन्द्र जडेजा विना उत्रदैछन् । उता भारतीय भूमिमा खासै सन्तोषजनक प्रदर्शन गर्न नसकेको न्युजिल्यान्ड पनि नयाँ चुनौतिका लागि तयार भएको छ । युवा बलरहरुले भारतीय उत्कृष्ट ब्याट्सम्यानहरुलाई संकटमा पर्ने सम्भावना रहेको विश्वास गरिएको छ ।

यद्दपी भारतविरुद्ध श्रृखंला जित्नका लागि स्पिनरहरुको चुनौति पार गर्नुपर्ने न्युजिल्यान्डका ब्याट्सम्यानले बझेका छन् । बायाँ हाते चाइनाम्यान बलर कुलदिप यादव, दायाँ हाते लेग ब्रेक युजभेन्द्र चाहालले भारतीय आक्रमण सम्हालिरहेका छन् । उनीहरुसँगै जसप्रित बुम्राह र भुवनेश्वर कुमार टोली थप शक्तिका रुपमा रहेका छन् ।

आइसिसीको एक दिवसिय वरियतामा अहिले भारत दोस्रो स्थानमा रहेको छ । न्युजिल्यान्डलाई ३–० ले हराउन सके दक्षिण अफ्रिकालाई पछि पार्दै भारत शीर्षस्थानमा उक्लनेछ । भारत र न्युजिल्यान्डबीचको तीन एक दिवसय श्रृखंलाको दोस्रो खेल पुनेमा बुधबार हुनेछ भने तेस्रो तथा अन्तिम खेल कानपुरमा अक्टुबर २९ मा हुने तय छ । त्यसपछि यी दुई टोली बीच तीन वटा टि ट्वान्टी खेल हुनेछ । न्युजिल्यान्ड अहिले वरियताको पाँचौं स्थानमा छ ।

थप जानकारी
– न्युजिल्यान्डविरुद्धका पछिल्ला पाँच एक दिवसिय मध्ये तीन खेलमा भारत विजयी भएको थियो ।
– सन् २०१७ मा एक दिवसिय क्रिकेटमा विराट कोहलीपछि १ हजार रन पुरा गर्न रोहित शर्मालाई अब ९८ रनको आवश्यकता रहेको छ ।
– घरलु मैदानमा न्युजिल्यान्डविरुद्ध भएका पाँच वटा एक दिवसिय श्रृखंला भारतले जितेको थियो ।
– भारत र न्युजिल्यान्डबीच एक दिवसिय क्रिकेटमा आजको खेल ९९ औं खेल हो भने भारतीय भूमिमा हुन लागेको ३३ खेल हो ।