दुबई (एजेन्सी)– हसन अलीको उच्च प्रदर्शनबाट प्रेरित पाकिस्तानले पहिलो टि ट्वान्टी क्रिकेटमा श्रीलंकालाई ७ विकेटले हराएको छ । एक दिवसिय श्रृखंला ५–० ले जितेको पाकिस्तानका लागि १४ विकेट लिएका अलीले गए रातिको खेलमा ३.३ ओभरमा २३ रन खर्चेर ३ विकेट लिएका थिए ।
जसका कारण पहिला ब्याटिङ गरेको श्रीलंकाले १८.३ ओभरमा सबै विकेट गुमाएर १ सय २ रन मात्र बनाउन सक्यो । पाकिस्तानले १७.२ ओभरमा ३ विकेटको क्षतिमा आवश्यक १ सय ३ रन बनाएको थियो । सिक्युज प्रसन्नले अविजित २३ रन बनाए भने सोही खेलमा डेब्यू गरेका साडेरा सामाराविक्रमाले २३ रन बनाएका थिए ।
जवाफमा पाकिस्तानका फाखर जमान (६), बाबर अजम (१), अहमद सेजाद १६ रन बनाएर आउट भएपनि सोहेब मल्लिक र मोहम्मद हाफिजले मोर्चा सम्हालेपछि टोलीले १६ बल बाँकी रहँदै खेल जितेको थियो । योसँगै ३ खेलको श्रृखंलामा पाकिस्तानले १–० को अग्रता लिएको छ । मलिकले अविजित ४२ रन जोडे । उनले ३१ बलमा ४ चौका प्रहार गरे । त्यस्तै हाफिजले २५ रन जोडे ।
यद्दपी पाकिस्तानको जितको आधार बलरहरुले तयार पारेका थिए । सुरुबाटै दबाबमा परेको श्रीलंका १० ओभरमा २ विकेटको क्षतिमा ५१ रन बनाएको थियो । तर त्यसपछि बाँकी ८ विकेट गुमाउँदा श्रीलंकाले ५१ रन मात्र बनाउन सक्यो । पाकिस्तानविरुद्ध श्रीलंकाको दोस्रो कम स्कोर हो । पाकिस्तानका ६ नै बलर विकेट लिन सफल भएका थिए । हाफिज र उमान सिनवारीले समान २ विकेट लिए । दोस्रो खेल आज हुनेछ ।
