कानपुर (एजेन्सी)– भारत र न्युजिल्यान्डबीच तीन एक दिवसिय क्रिकेट श्रृखंलाको तेस्रो तथा निर्णायक खेल आज हुँदैछ । श्रृखंलामा १–१ को बराबरी छ । 

पहिलो खेलमा ६ विकेटको जित हासिल गर्दै श्रृखंलाको सुरुआत गरेको न्युजिल्यान्डले दोस्रो खेलमा त्यसलाई निरन्तरता दिन सकेन । दोस्रो खेलमा भारतले पनि ६ विकेटकै जित निकालेर श्रृखंलामा पुनरागमन गरेको थियो ।

न्युजिल्यान्डले भारतमा सन् १९९५ , १९९९ र २०१६ मा खेलेका तीन श्रृखंलामा पनि अन्तिम खेल नै निर्णायक थिए । तर तीन वटामै अन्तिम खेल गुमाउँदा न्युजिल्यान्डले श्रृखंला गुमाएको थियो । एक पटक फेरि न्युजिल्यान्डले भारतीय भूमिमा श्रृखंला जित्ने अवसर पाएको छ ।

आजको खेलमा भारतीय कप्तान विराट कोहलीले दुवै रिस्ट स्पिनर युजभेन्द्र चाहल र कुलदिप यादवलाई खेलाउने अपेक्षा गरिएको छ । कोहली एकदिवसिय खेलमा ९ हजार रन पुरा गर्न मात्र ८३ रनले टाढा छन् ।

भारतका लागि सचिन तेन्दुलकर , राहुल द्रविड , महेन्द्र सिंह धोनी , सौरभ गांगुली र मोहमन अजरुद्दीनले मात्र अहिले सम्म ९ हजार रनको पुरा गरेका छन् । पहिलो खेलमा कोहलीले शतक बनाउनका वावजुद भारत पराजित भएको थियो ।