काठमाडौं (हाम्रो खेलकुद) – संयुक्त अरब इमिरेट्स (युएई) सँग हुने आइसीसी विश्व क्रिकेट लिग च्याम्पियनसिप (डब्लुसीएलसी) का अन्तिम दुई खेल खेल्न नेपाली क्रिकेट टोली आज त्यसतर्फ प्रस्थान गरेको छ । पारस खड्काको कप्तानीमा रहेको टोली इत्तिहाद विमानबाट आज दिउँसो ४ः३० बजे अबुधावी उडेकोे हो ।
टोलीमा प्रमुख प्रशिक्षक जगत टमाटा र व्यवस्थापक रमण सिवाकोटी पनि छन् । डब्लुसीएलसी अन्तरगत सातौं चरणको खेलमा नेपालले यूएईविरुद्ध मंसिर २० र २२ गते दुई वटा खेल खेल्नेछ । विश्वकप क्रिकेटमा छनोट हुने सिधा बाटो समाप्त भईसकेका दुई टोलीबीच प्रतिष्ठाको लडाईंमात्र हुनेछ । नेपाल र युएई अन्तिम खेलअघि नै डिभिजन २ मा घटुवा भइसकेका छन् ।
यूएईविरुद्ध खेल्नुअघि नेपालले दुईवटा अभ्यास खेल खेल्नेछ । नेपालले शुक्रबार अमेरिका र आइतबार केन्यासँग अभ्यास खेल खेल्नेछ । १४ सदस्यी राष्ट्रिय टोलीमा पर्न असफल अनिलकुमार साह र कुशल भुर्तेलले अभ्यास खेलमा भने मौका पाउने सम्भावना छ । वैकल्पिक खेलाडीका रुपमा रहेका अनिल र कुशल पनि टोलीसँगै अबुधावी उडेका छन् ।
टोलीका अन्य सदस्यमा ज्ञानेन्द्र मल्ल (उप कप्तान) , शक्ति गौचन, शरद भेषावकर, सागर पुन, बसन्त रेग्मी, बिनोद भण्डारी, सन्दिप लामिछाने, सोमपाल कामी, करण केसी, दिपेन्द्र सिंह ऐरी, आरिफ शेख, ललित भण्डारी र दिलिप नाथ छन् ।
