काठमाडौं (हाम्रो खेलकुद) – बाबार हायातले प्रतियोगिताकै छिटो अर्धशतक पुरा गरेपछि विराटनगर वारियर्सले चितवन टाइगर्सलाई जितका लागि १ सय ७५ रनको विजयी लक्ष्य दिएको छ । टीभिएस एभरेष्ट प्रिमियर लिग (इपिएल) टी–ट्वान्टी क्रिकेट प्रतियोगितामा विराटनगरले बनाएको यो प्रतियोगिताको सर्वाधिक रन हो । यसअघि विराटनगरले नै ललितपुरविरुद्ध १ सय ५० रन बनाएको थियो ।
त्रिवि क्रिकेट मैदानमा टस हारेर पहिले ब्याटिङ गरेको विराटनगरले निर्धारित २० ओभरमा ७ विकेट गुमाएर १ सय ७४ रनको विशाल योगफल तयार पार्यो । २५ बलमा अर्धशतक पुरा बाबारले ४२ बलमा ५ चौका र ६ छक्काको मद्दतमा सर्वाधिक ८१ रन बनाए । ओपनर आसिफ शेखलाई २१ रनमा गुमाएको विराटनगरका लागि बाबार हायात र अन्सुमान रथले दोस्रो विकेटका लागि १ सय ७ रनको साझेदारी गरेका थिए । अन्सुमान ४१ रनमा आउट भए । त्यस्तै कप्तान पारस खड्का १६ रनमा आउट भए । प्रनित थापामगर २ रन, अनिल कुमार शाह र पुष्प थापा शुन्य रनमा आउट भए ।
प्रविन गुप्ताले ५ विकेट लिए । विराटनगरको ५ विकेट लिएसँगै प्रविन इसराउल्लाहसँगै प्रतियोगितामा सबैभन्दा धेरै ७ विकेट लिनेको संयुक्त रुपमा शीर्ष स्थानमा छन् । प्रमेश कुमारले २ तथा योगेन्द्र सिंह कार्कीले १ विकेट लिए ।
चितवनले केही बेरमा ब्याटिङ थाल्नेछ ।
