काठमाडौं (हाम्रो खेलकुद) – लगातार तेस्रो जित निकाल्दै विराटनगर वारियर्स राजधानीमा जारी टीभिएस एभरेष्ट प्रिमियर लिग (इपिएल) टी–ट्वान्टी क्रिकेट प्रतियोगिताको प्ले अफमा पुग्ने पहिलो टोली बनेको छ ।

इपिएल अन्र्तगत शुक्रबार भएको खेलमा चितवन टाइगर्सलाई ७१ रनको फराकिलो अन्तरले पराजित गर्दै विराटनगरले प्ले अफमा स्थान बनाएको हो । विराटनगरले पहिलो खेलमा ललितपुरलाई ६ रनले तथा दोस्रो खेलमा पोखरा राइनोजलाई ३ विकेटले पराजित गरेको थियो ।

विराटनगरले दिएको १ सय ७५ रनको लक्ष्य पछ्याएको चितवन टाइगर्स १८.२ ओभरमा सबै विकेट गुमाएर १ सय ३ रनमात्र बनाउन सक्यो । चितवनका लागि मध्यक्रमका ब्याट्सम्यान भीम सार्कीले सर्वाधिक २४ रन बनाए । ओेपनर सन्दिप सुनार १६ रनमा आउट भए । कमल सिंह ऐरी १३ तथा सावेज १२ रनमा आउट भए । प्रविन गुप्ता १३ रनमा नटआउट रहे । कप्तान दीपेन्द्रसिंह ऐरी ९ रनमा आउट भए । योगेन्द्रसिंह कार्की ८ रनमा आउट भए । प्रमेश कुमार ४ रनमा रनआउट भए । ललितसिंह भण्डारी शुन्य रनमा आउट भए ।

चितवनलाई सस्तैमा समेट्न विराटनगरका बसन्त रेग्मी एक्लैले ४ विकेट लिए । अविनास कर्णले २ तथा अंशुमन रथ, अविनास कर्ण र पुष्प थापाले ले विकेट लिए ।
यसअघि टस हारेर पहिले ब्याटिङ गरेको विराटनगरले बाबार हायातको विस्फोटक ब्याटिङ मद्दतमा ७ विकेट गुमाएर १ सय ७४ रन बनाएको थियो । जुन प्रतियोगिताकै सर्वाधिक रन हो । यसअघि विराटनगरले नै ललितपुरविरुद्ध १ सय ५० रन बनाएको थियो ।

बाबारले प्रतियोगिताकै छिटो अर्धशतक पुरा गरेका बाबारले २५ बलमा अर्धशतक पुरा गरेका थिए । बाबारले ४२ बलमा ५ चौका र ६ छक्काको मद्दतमा सर्वाधिक ८१ रन बनाए । विकेटको रुपमा ओपनर आसिफ शेखलाई २१ रनमा गुमाएको विराटनगरका लागि बाबार हायात र अन्सुमान रथले दोस्रो विकेटका लागि १ सय ७ रनको साझेदारी गरेका थिए । अन्सुमान रथ ४१ रनमा आउट भए । पारस खड्का १६ रनमा आउट भए । प्रनित थापामगर २ रन, अनिल कुमार शाह र पुष्प थापा शुन्य रनमा आउट भए ।

प्रविन गुप्ताले ५ विकेट लिए । विराटनगरको ५ विकेट लिएसँगै प्रविन इसराउल्लाहसँगै प्रतियोगितामा सबैभन्दा धेरै ७ विकेट लिनेको संयुक्त रुपमा शीर्ष स्थानमा छ । प्रमेश कुमारले २ तथा योगेन्द्र सिंह कार्कीले १ विकेट लिए ।

प्रतियोगितामा शनिबार विराटनगर र भैरहवा तथा ललितपुर र चितवन टाइगर्सबीच खेल हुनेछ ।