लाहोर (हाम्रो खेलकुद) – नेपालले पाँचौं एकदिवसीय नेत्रहीन विश्वकप क्रिकेटमा लगातार दोस्रो हार व्यहोरेको छ । फैसलावादस्थित एकबल स्टेडियममा बुधबार भएको खेलमा नेपाल बंगलादेशसँग ४ विकेटले पराजित भएको हो ।

ब्याटिङमा खराब सुरुआतको बावजुद नेपालका मिडल अर्डरले पारी सम्हाल्दै सम्मानजनक स्कोर बनाएका थिए । तर, दोस्रो इनिङ्समा बलरले सुरुआती लयलाई निरन्तरता दिन नसक्दा नेपाल हार्न पुगेको हो ।

टस हारेर नेपालले प्रस्तुत गरेको २३५ रनको लक्ष्य बंगलादेशले ३३.३ ओभरमा ६ विकेटको क्षतिमा पूरा गर्‍यो । महमुद रशिदले अविजित ६० रनको पारी खेल्दै बंगलादेशलाई जित दिलाएका थिए । उनी ‘म्यान अफ द म्याच’समेत घोषित भए ।

रशिदले असिकर रहमानसँग छैटौँ विकेटको लागि ९१ रनको बलियो साझेदारी गर्दै बंगलादेशको जितको आधार तय गरेका थिए । दुर्गादत्त पौडेलको बलमा बोल्ड आउट हुनुअघि रहमानले ४५ रनको महत्वपुर्ण योगदान दिए । बंगलादेशको २०.२ ओभरमा १२३ रनमा ५ विकेट गुमिसकेको अवस्थामा रहमान र रशिदले पारी सम्हालेका थिए ।

नेपालका बलरले उत्कृष्ट सुरुआत गरे पनि सो लयमा निरन्तरता दिन नसक्दा खेल आफ्नो हातबाट फुस्किएको थियो । अब्दुल मल्लीकले ३८ रन र अब्दुल्लाह जोब्बीरले २६ रनको योगदान दिएका थिए । उसका ओपनर अरिफ उल्लाहलाई ४ रनमै नेपालका बलर खिमानन्द गैरले आउट गर्दै टोलीलाई राम्रो सुरुवात दिलाएका थिए ।

चौथो ओभरमा बंगलादेशका कप्तान तान्जिलुर रहमान ६ रनमा आउट भएका थिए । तर, त्यसपछिका बंगलादेशी ब्याट्सम्यानले सम्हालिएर ब्याटिङ गरे । नेपालको बलिङमा भरत थापाले २ तथा दुर्गादत्त, खिमानन्द गैरे र कप्तान किर्तन श्रेष्ठले १–१ विकेट निकाले पनि जित दिलाउन सकेनन् । नेपालका बलरले ३३ अतिरिक्त रन खर्चिएका थिए ।

त्यसअघि टस हारेर पहिले ब्याटिङ गरेको नेपालले निर्धारित ओभरमा ९ विकेटको क्षतिमा २ सय ३४ रनको योगफल तयार पारेको थियो । खराब सुरुआत गरेको नेपालले सम्हालिन नपाउँदै लगातार विकेट गुमाएको थियो । एक समय नेपालको खातामा ७२ रन हुँदा ६ विकेट गुमिसकेको थियो ।

तर, सातौँ विकेटका लागि खिमानन्द र कप्तान किर्तनले १ सय ९ रनको बलियो साझेदारी गर्दै नेपालको पारी उकासेका थिए । हिट द विकेट हुनुअघि खिमानन्दले ३४ रन बटुलेका थिए ।

३७ ओभरमा ३ चौकाको मद्दतले ६६ रन बनाएका किर्तन आउट भएका थिए । आक्रमक ब्याटिङ गरेका पदम बडेला पनि ३० रनमा रन आउटको शिकार भएपछि रनरेटमा खस्किएको थियो ।

बंगलादेशको बलिङमा खुर्सिद आलमले ३ विकेट लिएका थिए । अरिफ उल्लाहले २ तथा तान्जिलुर रहमानले १ विकेट लिए । नेपालले अब १३ जनवरीमा श्रीलंकासँग दुबईको अजमानमा तेस्रो खेल खेल्नेछ ।

राउन्ड रोविन लिगको आधारमा हुने विश्वकपमा लगातार दोस्रो हारसँग नेपालको सेमिफाइनलमा यात्रा कठिन भएको छ । बंगलादेशले २ खेलमा १ जित निकाल्दै अन्तिम ४ भित्र पर्ने सम्भावना बलियो बनाएको छ । लिगमा भारत र पाकिस्तानले २ जित निकालि सकेका छन् ।