दुवई (एजेन्सी) – अन्तर्राष्ट्रिय क्रिकेट परिषद (आईसीसी) ले एक दिवसीय विश्वकप क्रिकेट छनोट प्रतियोगिताको खेल तालिका सार्वजनिक गरेको छ । आईसीसीले सोमबार सन् २०१९ मा हुने विश्वकप क्रिकेटको लागि यहि बर्ष हुने छनोट खेलको तालिका सार्वजनिक गरेको हो ।
तालिकाअनुसार छनोट प्रतियोगिता मार्च १ तारिखदेखि २५ मार्चसम्म हुनेछ । छनोट खेलको समूह ‘ए’ मा वेष्ट इण्डिजसँगै आयरल्याण्ड, नेदरल्याण्ड, पपुवा न्युगिनी रहेका छन् । यो समुहमा आईसीसी विश्व क्रिकेट लिग डिभिजन २ को विजेता रहने छ । समूह ‘बी’ मा अफगानिस्तान, जिम्बावे, स्कटल्याण्ड र हङकङ रहेका छन् । त्यस्तै, आईसीसी विश्व क्रिकेट लिग डिभिजन २ को उपविजेता रहनेछ ।
आईसीसी विश्व क्रिकेट लिग डिभिजन २ नामिवियामा आगमी यह फेब्रुअरी ८ देखि १५ तारिखसम्म हुँदैछ । डिभिजन २ मा आयोजक नामिवियासँगै नेपाल, युएई, केन्या, ओमन र क्यानाडा रहेका छन् ।
नेपाल, नामिविया, केन्या र युएई आईसीसी विश्व क्रिकेट लिग च्याम्पियनसिपबाट घटुवा हुँदै डिभिजन २ मा झरेका हुन् । क्यानाडा र ओमन भने डिभिजन ३ को विजेता र उपविजेता बन्दै डिभिजन २ मा उक्लिएका हुन् । नेपाल आईसीसी विश्व क्रिकेट लिग डिभिजन २ को तयारीमा छ ।
