हेमिल्टन (एजेन्सी) – न्युजिल्याण्ड भ्रमणमा रहेको पाकिस्तानले चौथो एक दिवसिय खेलमा पनि पराजय बेहोरेको छ। हेमिल्टन क्रिकेट मैदानमा २६३ रनको मध्यम लक्ष्य पछ्याएको न्युजिल्याण्डले पाकिस्तानलाई ५ विकेटले हराएको हो। जितसंगै पाँच एक दिवसिय शृंखलामा घरेलु टोलीले ४–०को अग्रता लिएको छ ।
टस जितेर ब्याटिङ गर्ने निर्णय गरेको पाकिस्तानले निर्धारित ५० ओभरमा ८ विकेट गुमाउंदै २६२ रनको योगफल तयार पारेको थियो। ४ खेलाडीले अर्धशतक प्रहार गरेको पाकिस्तानको लागि अन्य खेलाडीले दोहोरो अंक छुन सकेनन्। पाकिस्तानका लागि ज़मानले ५४, सोहिलले ५०, अहमदले ५२ तथा हाफिजले सर्वाधिक ८१ रनको योगदान दिए। न्युजिल्याण्डका लागि साउथीले सर्वाधिक ३ विकेट लिए।
२६३ रनको लक्ष्य लिएर जवाफी ब्याटिङ् गर्न आएको घरेलु टोलीले ४५.५ ओभरमा ५ विकेट गुमाउदै लक्ष्य पुरा गरेको थियो। न्युजिल्याण्डको लागि ग्राण्डहोमले ४५ बलमा सर्वाधिक ७४ रनको योगदान दिए भने मुन्रोले ५६ र निकोल्सले ५२ रनको योगदान दिए। ग्राण्डहोमको करियरकै यो उत्कृष्ट पारी हो । पाकिस्तानका लागि सादाब खानले ३ विकेट लिए।
