कोलकाता (एजेन्सी)– साविक विजेता मुम्बई इन्डियन्स इन्डियन प्रिमियिर लिग (आइपिएल) अंक तालिकाको चौथो स्थानमा उक्लेको छ । कोलकाता नाइट राइडजर्सलाई १ सय २ रनले हराउँदै मुम्बई एक स्थानमा माथि उक्लेको हो । समान १० अंकको मुम्बई चौथो स्थानमा उक्लदा कोलकाता चौथोबाट पाँचौं स्थानमा झरेको छ ।

२ सय ११ रनको लक्ष्य पछ्याएको कोलकाता १८.१ ओभरमा सबै विकेट गुमाएर १ सय ८ रनमा समेटिएको थियो । टोलीका नितेश राना, क्रिस लेनले समान २१, टोम कुरुनले १८ र रोविन उथप्पाले १४ र पियुष चाउलाले ११ रन बनाउनु बाहेक कुनै पनि खेलाडीले दोहारो अंकमा रन बनाउन सकेनन् ।

मुम्बईका कुर्नाल पाण्डेय र हार्दिक पाण्डेयले समान २, मिचेल म्याक्लिघान, जसप्रित बुम्रहा, मयंक मर्कन्डे र बेन कटिङले समान १ विकेट लिए । त्यसअघि टस हारेर पहिले ब्याटिङको निम्तो पाएको मुम्बईले इशान किशनको अर्धशतकको मद्दतमा निर्धारित २० ओभरमा विकेट गुमाएर २ सय १० रन बनाएको थियो ।

सूर्यकुमार यादव र इभिन लेविसले पहिलो विकेटका लागि ४६ रनको साझेदारी गरेको खेलमा तेस्रो विकेटका लागि कप्तान रोहित शर्मा र इशानले ८२ रनको साझेदारी गरेका थिए । इशानले २१ बलमा टोलीका लागि सर्वाधिक ६२ रन जोडेका थिए । उनले ६ छक्का र ५ चौका प्रहार गरे ।

रोहित र सूर्य कुमारले समान ३६ रन जोडे । सूर्यकुमारले ३२ बलमा ५ चौका र १ छक्का प्रहार गरे । ३१ बल खेलेका रोहितले २ चौका र १ छक्का प्रहार गरे । हार्दिक पाण्डेयले १३ बलमा २ छक्कासहित १९ रन जोडे । लेविसले १८ रन बनाए । अन्तिम ओभरमा १६ रन जोडेका बेन कटिङले २४ रन बटुले ।

कोलकाताका पियुष चावलाले ३, प्रसिद्ध कृष्ण, टोम कुरान र सुनिल नारिनले समान १ विकेट लिए । आइपिएलमा बिहीबार शीर्षस्थानको सनराइजर्स हैदराबाद (१६) र दिल्ली डेयरडेभिल्स (६) बीच प्रतिस्पर्धा हुनेछ ।