काठमाडौं (हाम्रो खेलकुद)– युरोप यात्रामा रहेको नेपाली क्रिकेट टोलीले मभ्यास खेलमा धुवाँधार ब्याटिङ गरेको छ । कप्तान पारस खड्काले आक्रामक ब्याटिङ गर्नेक्रममा शतक बनाएपछि नेपालले ह्याम्पसायर हग्स क्रिकेट क्लब विरुद्ध ३ सय ६२ रन बनाएको छ ।

टस जितेर पहिले ब्याटिङ गरेको नेपालले कप्तान पारसको १ सय ६१ रनको मद्दतमा ठूलो स्कोर खडा गरेको थियो । नेपालले ५० ओभरमा सबै विकेट गुमाएर त्यो योगफल तयार पारेको हो ।

टस जितेर ब्याटिङ गरेको नेपालका लागि पारसले १ सय ७ बल खेल्ने क्रममा १९ चौका र ७ टक्का प्रहार गरेका थिए । रोहित पौडेलले ४४ र दीपेन्द्र सिंह ऐरीले ३७ रन बनाएका थिए ।

त्यस्तै आरिफ शेखले २७, करण केसीले १८,सन्दीप लामिछाने र ललित सिंह भण्डारीले समान १६, शरद भेषावकरले १४, सुवास खकुरेलले ११ र उप कप्तान ज्ञानेन्द्र मल्ले ५ रन जोडे । हग्स क्रिकेट क्लबका लागि माइल्स कोभर्स र जोन पोर्टलले समान ३ तथा जेम्स ग्रिनले २ विकेट लिए । टोली अहिले ३ सय ६३ रनको लक्ष्य पछ्याइरहेको छ ।

नेपालले जुलाई २९ मा लर्डस्मा एमसीसी र नेदरल्यान्ड्सम्मिलित त्रिकोणात्मक ट्वान्टी ट्वान्टी श्रृखंला खेल्नेछ । त्यसपछि नेपालले नेदरल्यान्ड्ससँग अगस्ट १ र ३ मा एक दिवसिय अन्तर्राष्ट्रिय खेल खेल्नेछ । झन्डै पाँच महिला अघि एक दिवसय मान्यता पाएयता नेपालको यो पहिलो एक दिवसिय खेल हुनेछ ।