काठमाडौ (हाम्रो खेलकुद)-नेदरल्यान्ड्ससँगको ऐतिहासिक एक दिवसीय अन्तर्राष्ट्रिय क्रिकेट सिरिज अन्र्तगत नेपालले शुक्रबार दोस्रो तथा अन्तिम खेल खेल्दैछ । खेल नेदरल्यान्ड्सको एमस्टेलभिनस्थित भिआरए क्रिकेट मैदानमा दिउसो २ः४५ बजेपछि शुरु हुनेछ ।

राम्रो शुरुवात गर्नका बावजुत मध्यक्रमका ब्याट्सम्यान चल्न नसक्दा नेपाल जित नजिक पुगेर पनि ‘डेब्यु’ ऐतिहासिक खेलमा घरेलु टोलीसँग ५५ रनले पराजित हुन पुगेको थियो । डेब्यु एक दिवसीयमा नेपालले उच्च बलिङ गरेको थियो ।

फिल्डिङ पनि उच्च रहँदा ब्याटिङमा अग्रपङ्तिका ओपनरले राम्रो साझेदारी गर्नुबाहेक अन्य ब्याट्सम्यान चल्न सकेनन् । डेब्यु एक दिवसीय अन्तर्राष्ट्रिय क्रिकेटलाई यादगर बनाउन पनि नेपालले शुक्रबार हुने खेल जित्नैपर्ने दवाव छ ।

बलिङमा राम्रो प्रदर्शन गरेको नेपालले अन्तिम तथा दोस्रो एक दिवसीय खेलमा ब्याटिङमा सुधार गर्नुपर्ने देखिन्छ । पहिलो खेलमा जस्तो गल्ती गर्न नेपाललाई छुट हुनेछैन । तर, पहिलो खेलमा लागेको चोटका कारण मध्यक्रमका भरपर्दा ब्याट्सम्यान शरद भेषवाकरले आजको खेल खेल्ने छैनन् । टोलीमा उनको अभाव खड्किनेछ ।

उनले आजको खेलमा सहभागिता जनाउने छैन । नेपाली टोलीका कप्तान पारस खड्काले राम्रो शुरुवात गर्नाका बाजजुत लगातार विकेट पतन हुदा हार बेहोर्नु परेको बताएका थिए । कप्तान खड्काले भरपर्दा शरद भेषवाकर घाइते हुनु पनि टिमका लागि घाटा भएको प्रतिक्रिया दिए ।

शरदले पहिलो इनिङ्समा फिल्डिङ गर्ने क्रममा औलामा चोट बोकेपछि अन्तिम नम्वरमा ब्याटिङमा आएका थिए । डेब्यु खेलमा नेदरल्यान्ड्सले दिएको १ सय ९० रनको मध्यम लक्ष्य पछ्याएको नेपाल ४१ ओभर ५ बलमा सबै विकेटको क्षतिमा १ सय ३४ रनमा समेटिएको थियो ।

यसक्रममा ओपनर तथा उपकप्तान ज्ञानेन्द्र मल्लले ५१ रनको अर्धशतकीय इनिङ्स खेलेका थिए । ओपनर अनिल कुमार साह र मल्लले पहिलो विकेटको लागि ५८ रनको साझेदारी गरेपनि त्यसपछि नेपालले ठुलो साझेदारी बनाउन सकेन ।

मध्यक्रमका दीपेन्द्रसिंह ऐरीले ३३ रन जोडेका थिए । नेदरल्यान्डलाई १ सय ८९ रनमै समेट्ने क्रममा कप्तान पारस खड्काले ४ विकेट हात पारेका थिए ।