काठमाडौं (हाम्रो खेलकुद) – पाँचौ संस्करणको सेञ्चुरी बैंक कर्पाेरेट सुपर सिक्सेस क्रिकेट प्रतियोगिता मंसिर दोस्रो सातादेखि शुरु हुने भएको छ ।

आयोजक एस एस इभेन्ट प्रालिले सोमबार राजधानीमा पत्रकार सम्मेलनको आयोजना गर्दै प्रतियोगिता मंसिर १० गतेबाट १५ गतेसम्म हुने जानकारी गराएको हो । सेञ्चुरी बैंकको मुख्य प्रायोजनमा हुन लागेको पाँचौ संस्करणको प्रतियोगितामा विगतका वर्षमा जस्तै विभिन्न २४ कर्पाेरेट टोलीले सहभागिता जनाउने एस एस एभेन्टस् प्रालिका प्रमुख कार्यकारी अधिकृत (सिइओ) रमन शिवाकोटीले जानकारी गराए ।

सुपर सिक्सेस प्रतियोगितामा सहभागी टोलीलाई आठ समूहमा विभाजन गरिने छ । हरेक समूहमा तीन कर्पाेरेट टिमहरु रहनेछन् । लिग कम नकआउटको आधारमा हुने प्रतियोगिताको हरेक समूहको शीर्ष दुई टोली प्रि–क्वार्टरफाइनलमा प्रवेश गर्नेछन् ।

५ ओभरको खेलमा एक टिममा ८ खेलाडीसहित १० जना हुनुपर्नेछ । प्रतियोगितामा सहभागिता जनाउने खेलाडी करिव ६ महिनादेखि बैंकमा कार्यरत हुनुपर्नेछ ।

प्रतियोगितामा सहभागिताको लागि ६ हजार ५ सय दर्ता शुल्क तोकिएको छ । प्रतियोगिता सञ्चालन गर्न करिव ३२ लाख खर्च हुने अनुमान गरिएको छ । प्रतियोगिताको विजेताले ट्रफीसहित आकर्षक गिफ्टका साथै अर्काे वर्षको प्रतियोगितामा निशुल्क प्रवेश पाउनेछन् । उपविजेताले पनि ट्रफीसँगै गिफ्ट ह्याम्पर प्राप्त गर्नेछन् ।

प्रतियोगिताको सर्वाेत्कृष्ट खेलाडीले ट्रफी र गिफ्ट ह्याम्पर तथा उत्कृष्ट ब्याट्सम्यान, बलर, फिल्डर र विकेट किपरले आकर्षक पुरस्कार प्राप्त गर्नेछन् । त्यस्तै हिट दि बोर्ड र फेयर प्ले टिम पनि पुरस्कृत हुनेछन् । प्रतियोगिता कीर्तिपुरस्थित त्रिवि क्रिकेट मैदानमा हुनेछ । प्रतियोगिताको गत संस्करणमा सिभिल बैंक च्याम्पियन बनेको थियो ।