काठमाडौं (हाम्रो खेलकुद) – दक्षिण अफ्रिकाका पूर्व क्रिकेटर एवं मुम्बई इन्डियन्सका पूर्व प्रशिक्षक जोन्टी रोड्सको कप्तानीमा रहेको जोन्टी ११ ले शनिबार टीयू मैदानमा भएको च्यारिटी खेलमा पारस ११ लाई १ विकेटले पराजित गरेको छ ।

पहिलो ब्याटिङ गरेको पारस ११ ले २० ओभरमा ७ विकेट गुमाउँदै २ सय ९ रनको योगफल खडा गरेको थियो । जवाफमा जोन्टी ११ ले अन्तिम ओभरमा ९ विकेट गुमाउँदै लक्ष्य प्राप्त गर्यो । पारस ११ टोलीमा कप्तान पारस खड्कासँगै चिर परिचित कमेडीयन सन्दीप क्षेत्री पनि खेलेका थिए । सन्दीपले खेलमा बलिङ, ब्याटिङ र फिल्डीङ तीनै पक्षमा रमाइलो प्रदर्शन गरेका थिए । पारसको टोलीबाट राष्ट्रिय टोलीका विनोद भण्डारी, आरिफ शेख, आसिफ शेख, ललित सिंह भण्डारी, कमल सिंह ऐरी, लगायतका खेलाडी खेलेका थिए ।

जोन्टी ११ बाट कप्तान रोड्ससँगै अभिनेता सुनील थापा, प्रशिक्षक मन्जुर आलम खान, दीपेन्द्र चौधरी, राष्ट्रिय टोलीका अनिल कुमार साह, सुवास खकुरेल, लगायत आयोजक टोलीका सदस्यले प्रतिस्पर्धा गरेका थिए । रोड्स ‘राइज अफ द क्रिकेटिङ’ हाइ पर्फर्मेन्स क्याम्पका लागि पछिल्लो दुई सातादेखि नेपालमा छन् । कार्यक्रमको नेपाल क्रिकेट स्कुल (एनसीएस) र स्पोर्ट्स एडले संयुक्त रुपमा आयोजना गरेका हुन् ।

दुई साता लामो बसाईमा रोड्सले उमेर समूहको राष्ट्रिय टोलीको प्रतिनिधित्व गरेका युवा क्रिकेटर तथा खुला आवेदनमार्फत दर्ता भएकालाई प्रशिक्षण दिइरहेका छन् । आयोजकले शनिबार विश्व अटिजम दिवसको अवसरमा च्यारिटी खेलको आयोजना गर्ने कार्यक्रम राखेको छ । अटिजम केयर नेपाल सोसाइटीको कास्की जिल्ला च्याप्टरको सहयोगार्थ भएको खेलमा दर्शकहरुको लागि भने प्रवेश नि:शुल्क रहेको थियो ।

खेलको केहि तस्बिरहरु :

खेलको अन्य तस्बिरहरु हेर्न यहाँ थिच्नुहोस्

https://www.facebook.com/media/set/?set=a.1766655513444109&type=3&uploaded=103