काठमाडौं (हाम्रो खेलकुद) – तेस्रो संस्करणको टिभीएस एभरेष्ट प्रिमियर लिग (ईपीएल) को दोस्रो दिन आज दुई खेल हुँदैछन् । पहिलो खेलमा ललितपुर प्याट्रीयट्स र चितवन टाइगर्सबीच प्रतिस्पर्धा हुनेछ । खेल ९ बजेबाट सुरु हुनेछ ।

ललितपुरको कप्तानी ज्ञानेन्द्र मल्लले गर्ने छन् भने पृथु बास्कोटाले चितवनको कप्तानी सम्हाल्ने छन् । चितवन पहिलो खेल जितका साथ प्रतियोगितामा सुखद सुरुवात गर्न चाहन्छ । यता पहिलो खेलमा विराटनगरसँग ३ विकेटले पराजित भएको ललितपुर दोस्रो खेलमा जित निकाल्न चाहान्छ ।

चितवन टाइगर्समा विदेशी खेलाडीको रुपमा इंग्ल्यान्डका जोन सिम्पसन, जर्ज स्कट र टेस्ट राष्ट्र आयरल्यान्डका विष्फोटक ओपनर ब्याट्सम्यान पाउल स्टर्लिङ रहेका छन् । त्यस्तै दिपेन्द्र सिंह ऐरी, दिलिप नाथ, भिम सार्की, ललितसिंह भण्डारी, साहव आलम, कमलसिंह ऐरी, आदिल खान, सागर ढकाल र आकाश थापा चितवनका मुख्य खेलाडी हुन् ।

कागजी लिष्टमा हेर्दा ललितपुरले खासै ठूला नाम गरेको विदेशी खेलाडी टिममा अनुबन्ध गरेको छैन । तर नेपाली घरेलु मैदान र दर्शक भने ती खेलाडीलाई नौला होइनन् । डीपीएल, पीपीएल र ईपीएलमा उत्कृष्ट प्रर्दशन गर्दै आएका भारतीय सन्नी पटेल,जयकिशन कोल्सावाला र गौरभ तोमर ललितपुरका विदेशी रहेका छन् ।

राष्ट्रिय तथा अन्तर्राष्ट्रिय स्तरमा उत्कृष्ट प्रर्दशन गरि रहेका सन्दीप लामिछाने अन्तिम खेल खेल्ने छन् । सन्दीप बिग बास र वंगालदेश प्रिमियर लिग जाने भएकाले अन्य सबै खेल गुमाउने भएका छन् । ललितनारायण राजवंशी, राशिद खान, आक्रमक ब्याट्सम्यान कुशल भुर्तेल,सन्दीप जोरा,सोनु तामाङ ललितपुरका प्रमुख खेलाडी हुन् ।

दोस्रो खेलमा पोखरा राइनोजले भैरहवा ग्ल्याडीयटर्सको सामना गर्ने छ । खेल दिउँसो १ वजेबाट सुरु हुने छ । यस पटक ईपीएल खेल्ने ठूला नामका खेलाडी यी दुवै टोलीबाट खेल्नेछन् । गत वर्ष १ रनले उपाधि चुम्न चुकेको भैरहवा ग्ल्याडीयटर्सबाट नेदरल्यान्डका ब्याटिङ अलराउण्डर रायन टेन डोस्काटे,यूईका तीव्र गतिका बलर मोहम्मद नाविद र भारतीय ब्याट्सम्यान रविइन्दर सिंह खेल्ने छन् ।

डोस्काटे एसोसिएट स्टार खेलाडीको रुपमा चिनिन्छन् । नाविद भने केहि दिनपछि मात्र टोलीमा सामेल हुनेछन् । त्यस्तै भैरहवामा युवा खेलाडी हरिशंकर शाह,आरिफ शेख, रोहित कुमार पौडेल, प्रदीप ऐरी, भुवन कार्की, कृष्ण कार्की,भुपेन्द्र थापा जस्ता मुख्य खेलाडीको प्रर्दशनमा भरपर्ने छ ।

पोखराको कप्तानी स्कटल्यान्डका काइल कोट्जरले गर्ने छन् । यस पटक ईपीएलमा विदेशी खेलाडीको रुपमा कप्तान गर्ने कोट्जर एक्लो खेलाडी हुन् । दक्षिण अफ्रिकाका ओपनर रिचर्ड लेभी पनि पोखराबाट खेल्ने छन् । लेभी यस पटक ईपीएल खेल्ने १९ विदेशी खेलाडी मध्य सर्वाधिक ठूला नाम अर्थात उच्च स्तरका खेलाडी हुन् । पोखरामा लेभीसँगै इङ्ल्यान्डका अलराउण्डर पाउल कोग्लिन र हङकङका सन्नी भिमसारिया छन् । शक्ति गौचन, सुनिल धमला, विनोद भण्डारी, सौरभ खनाल, सुसन भारी, विक्रम शोब, राजेश पुलामी मगर पोखराका भरपर्दा खेलाडी हुन् ।

काइल कोट्जर