काठमाडौं (हाम्रो खेलकुद) – एभरेष्ट प्रिमियर लिग (ईपीएल) अन्तर्गत मंगलबारको पहिलो खेलमा विराटनगर वारीयर्सले पोखरा राइनोजलाई सुपर ओभरमा पराजित गरेको छ । सुपर ओभरमा विराटनगरले २० रन जोड्दा पोखराले १३ रन मात्र जोड्न सक्यो ।

त्यसअघि दुवै टोलीले आफ्नो इनिङसमा ८४ रन जोडेपछि खेल सुपर ओभरमा पुगेको थियो । पहिलो ब्याटिङ गरेको पोखराले २० ओभरमा ७ विकेट गुमाउँदै ८४ रन जोड्दा विराटनगर अन्तिम ओभरमा ८४ रन जोड्दै अलआउट भएको थियो ।

सुपर ओभरमा विराटनगरका लागि करण केसी र पारस खड्का ब्याटिङमा आएका थिए । पोखराका पल कोग्लिनको बलिङमा करणले तेस्रो र पाँचौ बलमा छक्का प्रहार गरे । बाँकी सबै बलमा २ रन लिएपछि विराटनगरले २० रन जोडेको थियो ।

जवाफी ब्याटिङमा पोखराका रिचार्ड लेभी र विनोद भण्डारी ब्याटिङमा आएका थिए । विराटनगरका रोलफ भान डर मर्वले लेभीलाई पहिलो बल डट र दोस्रोमा एक रन खर्चे । तेस्रो बलमा विनोदले छक्का प्रहार गरे । चौथो र पाँचौ बलमा एक-एक रन भयो । अन्तिम बलमा चौका भयो । पोखराले सुपर ओभरमा १३ रन मात्र जोड्यो ।

भान मिकरेन

त्यसअघि ८५ रनको सामान्य लक्ष्य पछ्याएको विराटनगर अन्तिम ओभरमा ८४ रनमा अलआउट भएपछि खेल सुपर ओभरमा धकेलिएको थियो । विराटनगरका कप्तान पारस खड्का आफै ओपनरको रुपमा मैदान उत्रिएका थिए । पहिलो ओभरको तेस्रो बलमै ओपनर अनिल कुमार शाहलाई विपिन खत्रीको हातबाट क्याच गराउदै शुसन भारीले खाता सम्म खोल्न दिएनन् । दोस्रो ओभरको पहिलो बलमै पारस खड्कालाई विपिन खत्रीले विकेटकीपर सुबेन्दु पाण्डेको हातबाट क्याच गराउँदै १ रनमा पेभिलिएनको बाटो देखाएका थिए ।

छैटौं ओभरको दोस्रो बलमा शक्ति गौचनले आशिफ शेखलाई १९ रनमा कप्तान काइल कोट्जरको हातबाट क्याच आउट गराएपछि विराटनगरले खराव सूरुवात गरेको थियो । शुसन भारीले सातौं ओभरको तेस्रो बलमा स्मीत पटेललाई ८ रनमा पेभिलिएन फर्काएपछि विराटनगर ७ ओभरमा ३४ रन बनाउन ४ विकेट गुमाएको अवस्थामा पुगेको थियो । विपिन खत्रीले ८. २ ओभरमा रोलफ भान डर मर्वलाई ११ रनमा बोल्ड आउट गर्दिए ।

विराटनगर वारीयर्स

पल कोग्लिनले रबिन क्षेत्रीलाई १२ ओभरको दोस्रो बलमा १२ र विक्रम सोबले १३ ओभरको चौथो बलमा सुमित महर्जनलाई ४ रनमा आउट गरेपछि पोखराको जितको आसा देखाएको थियो । विराटनगर १३ ओभरमा ५७ रन बनाउन ७ विकेट गुमाउदै कमजोर अवस्थामा पुगेको थियो ।

करण केसीले १९ बलमा समान १ चौका र छक्का प्रहार गर्दै १५ रनमा आउट भए । हरि चौरान १२ रनमा नट आउट रहे । पोखराका लागि विपिन खत्रीले ३, शुसन भारी, पल कोग्लिन र बिक्रम सोवले समान दुई विकेट लिए । शक्ति गौचनले १ विकेट लिए ।

राजेश पुलामी मगर

त्यसअघि कीर्तिपुरस्थित टीयू क्रिकेट मैदानमा टस हारेर पहिला ब्याटिङ थालेको पोखराले २० ओभरमा ७ विकेटको क्षतिमा ८४ रन बनाएको थियो । पोखराको सुरुवात देखीनै खराब प्रर्दशन गर्यो । पोखराले ३.५ ओभरमा १९ रन बनाउन ४ विकेट गुमाएको थियो । पहिलो विकेटका रुपमा कप्तान काइल कोट्जरलाई ४ रनमा रोलफ भान डर मर्वले पहिलो ओभरको अन्तिम बलमा विकेटकीपर आशिफ शेखको हातबाट क्याच आउट गराउदै पेभिलिएन फर्काए ।

पल भान मिकरेनले दोस्रो ओभरको दोस्रो बलमा सुबेन्दु पाण्डेलाई डक आउट र तेस्रो ओभरको तेस्रो बलमा मर्वले रिचर्ड लेभीलाई ४ रनमा पेभिलिएनको बाटो देखाएपछि पोखरा सूरुवातमै दबाबमा परेको थियो । त्यस्तै चौथो ओभरको पाँचौ बलमा बसन्त रेग्मीले विनोद भण्डारीलाई १ र पल कोग्लिनलाई ११ ओभरको तेस्रो बलमा मिकरेनलेले २० रनमा आउट गरेपछि पोखरा ४९ रन जोड्न ५ विकेट गुमाएर कमजोर अवस्थामा पुगेको थियो ।

पोखराको विकेट पतन निरन्तर जारी रह्यो । निरन्तर विकेटको सिलिसिलालाई कुनै पनि ब्याट्सम्यानले रोक्न सकेनन् । छैटौं विकेटका लागि शुसन भारी र राजेश पुलामी मगरले २१ रनको साझेदारी गर्दै पोखराको इनिङ उकास्ने प्रयास गरेका थिए । तर स्मित पटेलले १५.५ ओभरमा राजेशलाई १७ रनमा करण केसीको हातबाट क्याच गराउदै पेभिलिएन फर्कापछि पोखरा पूर्णरुपमा धरासयी बनेको थियो । सातौं विकेटका रुपमा भारी ८ रनमा आउट भए । शक्ति गौचन ३ र बिक्रम शोब ५ रनमा नट आउट रहे ।

विराटनगरका लागि पल भान मिकरेनले ४ ओभरमा १७ रन खर्चेर ३ वकेट लिए । रोलफ भान डर मर्वले ४ ओभरमा २० रन खर्चेर २ विकेट लिए । सन्नी पटेलले कसिलो बलिङ गरे । पटेलले ४ ओभरमा १० रन खर्चेर १ विकेट लिए । बसन्त रेग्मीको नाममा पनि १ विकेट रह्यो ।