काठमाडौं (हाम्रो खेलकुद) – भैरहवा ग्ल्याडीयटर्सले एभरेष्ट प्रिमियर लिग (ईपीएल) अन्तर्गत मंगलबारको दोस्रो खेलमा चितवन टाइगर्सलाई १२ रनले पराजित गर्दा अलराउण्ड प्रदर्शन गरेका डच खेलाडी रायन टेन डोस्काटे खेलको म्यान अफ द म्याच चुनिए ।

तस्बिर सौजन्य : भैरहवा ग्ल्याडीयटर्सको फेसबुक

भैरहवाको लागि रायन टेन डोस्काटे र अभिनाश बोहोराले घातक बलिङ गरेका थिए । बोहाराले ४ ओभरमा १३ रन खर्चेर १ विकेट लिँदा डोस्काटेले समान ओभरमा मात्र १२ रन खर्चेर एक महत्वपूर्ण विकेट लिए । डोस्काटेले पल स्टरलिङलाई आउट गर्दा अभिनास बोहोराले महत्वपूर्ण समयमा दिलिप नाथलाई आउट गरेका थिए ।

खेल सकिएपछि म्यान अफ द म्याच डोस्काटेलाई दिईयो । डोस्काटेले ब्याटिङमा पनि ३५ रनको योगदान दिएका थिए । त्यसैले पनि म्यान अफ द म्याच पाउनु स्वभाविक थियो । तर टिम होटलमा पुगेर डोस्काटेले आफुले पाएको म्यान अफ द म्याच भने अभिनाश बोहोरालाई दिएका छन् । भैरहवाले फेसबुक पेजमार्फत डोस्काटेले अवार्ड अभिनासलाई दिएको जनाएको छ ।

डोस्काटेले जितपछि पत्रकार सम्मेलनमा बोल्दै अभिनसको प्रशंसा पनि गरेका थिए । उनले नेपाली क्रिकेटमा प्रतिभा भरपुर रहेको तर खेलाडीहरु मानसिक रुपमा बलियो हुनुपर्ने पक्षबारे बोलेका थिए । खेलमा उत्कृष्ट प्रर्दशन गर्ने एक खेलाडीले मात्र यस्तो पुरस्कार पाउने गर्दछन् । आफुले पाएको पुरस्कार डोस्काटेले अभिनासलाई दिएर जुन महानता देखाएका छन् त्यसले अभिनासलाई अझै राम्रो प्रर्दशन गर्न प्रेरणा समेत मिल्ने छ ।