काठमाडौं (हाम्रो खेलकुद) – बनेपा क्रिकेट ऐडेमी एन्ड स्पोर्टस् सेन्टरको आयोजनामा माघमा स्कुल लिग क्रिकेट (एसएलसी) प्रतियोगिता हुने भएको छ ।
प्रतियोगिता माघ ५ देखि १९ गतेसम्म पुल्चोकस्थित इन्जिनियरिङ कलेको मैदानमा हुने बिहिबार आयोजित पत्रकार सम्मेलनमा प्राविधिक संयोजक विनय झाले जानकारी दिए । प्रतियोगितामा राजधानी र आसपासका १० टोलीको सहभागिता रहने बताइएको छ ।
सहभागी टोलीलाई दुई समूहमा विभाजन गरि लिग कम नकआउटका आधारमा प्रतियोगिता सञ्चालन गरिने बताइएको छ । लिग पछि समूहका शीर्ष २ टोली सेमिफाइनल पुग्नेछन् । लिग चरणका खेल २० ओभर तथा सेमिफाइनल फाइनल भने २५ ओभरको खेलाइने जनाइएको छ ।
प्रतियोगिताको विजेता टोलीले ७१ हजार तथा दोस्रो हुने टोलीले २१ हजार रुपैयाँ पाउनेछ । म्यान अफ दि टुर्नामेन्टले क्रिकेटको पुरा सेट प्राप्त गर्नेछन् । त्यस्तै बेष्ट बलर, बेष्ट ब्याट्सम्यान तथा प्रत्येक खेलको म्यान अफ दि म्याच बन्ने खेलाडीलाई गिफ्ट ह्याम्पर प्रदान गरिने बताइएको छ ।
