काठमाडौं (हाम्रो खेलकुद) – अपराजित भैरहवा ग्ल्याडीयटर्स र ललितपुर प्याट्रीयट्स लगातार तीन जित दर्ता गर्दै तेस्रो संकरणको टिभीएस एभरेष्ट प्रिमियर लिग (ईपीएल) को प्लेअफमा प्रवेश गरेका छन् । समुह चरणका ९ खेल सकिँदा यी दुईसँगै अन्य चार टोलीको पनि प्लेअफ पुग्ने सम्भावना जिवितै छ ।

विराटनगर वारीयर्स, काठमाडौं किंग्स इलेभान, चितवन टाइगर्स र पोखरा राइनोज मध्य दुई टोलीले प्ले अफमा स्थान बनाउने छन् । ईपीएलमा समुह चरणका ६ खेल बाँकी छँदा चितवन र पोखराको भने प्लेअफ पुग्ने सम्भावना कमजोर छ । ६ खेलको नतिजाले प्लेअफ पुग्ने दौडमा बाँकी चार टोलीको भविष्य निर्धारण हुने छ । दुई टोली प्ले अफमा पुग्दा अन्य दुई टोली समुह चरणबाटै घर फर्किने छन् ।

प्लेअफ दौडमा रहेका टोलीमध्य काठमाडौंले ३ खेल खेल्न बाँकी छ भने अन्य तीनै टोलीले समान दुई खेल खेल्न बाँकी छ । चितवन र पोखराले जितको खाता खोल्न सकेका छैनन् । तैपनि दुवै टोली लगातार जित दर्ता गरेर समिकरण मिलेको खण्डमा अर्को चरण पुग्न सक्छन् ।

हेर्नुहोस्, कुन टोली कसरी पुग्न सक्छन् त प्ले अफमा :

विराटनगर वारीयर्स

पारस खड्का कप्तान रहेको वारीयर्स गत संस्करणको च्याम्यिन टोली हो । यस पटक विराटनगरको प्रर्दशन सन्तोषजनक रहन सकेको छैन । उपाधिको प्रमुख दावेदार मानिएको विराटनगर जारी ईपीएलमा ३ खेलमा दुईमा जित र १ मा हार सहित ४ अंकका साथ तेस्रो स्थानमा रहेको छ । यद्यपी विराटनगरको प्ले अफ सम्भावना अन्य तीन टोली भन्दा उच्च रहेको छ ।

कप्तान पारस खड्का स्वयंले यसपटक ब्याटिङ चल्न नसकेको स्वीकारेका छन् । बाबर हायातको आगमनले टोलीको ब्याटिङमा केहि मजबुती पुग्ने अपेक्षा गर्न सकिन्छ । विराटनगरले अब चितवन र काठमाडौंसँग खेल्न बाँकी छ । यी दुई मध्य एक खेलमा जित निकाल्न सके विराटनगर ६ अंकका साथ सोझै प्लेअफमा स्थान बनाउने छ । दुवै खेलमा पराजित भएको अवस्थामा विराटनगरको भविष्य रनरेटले निर्धारण गर्नेछ ।

विराटनगरले पहिलो खेलमा ललितपुरमाथि ३ विकेटको संघर्षपूर्ण जित निकाल्दा दोस्रो खेलमा पोखरालाई सुपर ओभरमा हराएको थियो । उक्त खेलमा विराटनगरले ८५ रन पनि पछ्याउन सकेको थिएन । तेस्रो खेलमा भने विराटनगर  भैरहवासँग ४ विकेटले पराजित हुन पुग्यो ।

काठमाडौं किंग्स इलाभेन

२ खेलमा समान एकमा जित हारका २ अंक जोड्दै काठमाडौं चौथो स्थानमा छ । काठमाडौंले पोखरा, विराटनगर र भैरहवासँग खेल्न बाँकी छ । यी तीन खेल मध्य दुई खेलमा जित निकाले काठमाडौं सोझै प्लेअफमा पुग्दै उपाधि होड कायम राख्नेछ । चितवन र पोखरा एक-एक खेलमा पराजित भए र यता काठमाडौंले तीन मध्य एक खेलमा जित निकाल्दा पनि प्ले अफमा आफ्नो स्थान सुरक्षित गर्नेछ ।

काठमाडौं बाँकी तीनै खेलमा पराजित भए ईपीएलमा अघिल्लो चरणको ढोका बन्द हुने छ । तीन मध्य एक खेलमा जित निकाल्न सके पनि नेट रनरेटका आधारका काठमाडौं अघिल्लो चरणमा प्रवेश गर्न सक्ने देखिन्छ । पहिलो खेलमा चितवनलाई ६ विकेटले हराएको काठमाडौंले दोस्रो खेलमा ललितपुरसँग १० विकेटको फराकिलो हार खान पुगेको थियो । १० विकेटको फराकिालो हारले काठमाडौंलाई नेट नरेटमा ठूलो धक्का लागेको छ ।

चितवन टाइगर्स

पछिल्लो संस्करण सेलाएको टाइगर्स यस पटक पनि गर्जन सकेन । गत वर्ष पुछारमा रहेर समुह चरणबाटै घर फर्किएको चितवन यस पटक त्यहि पथमा अघि बढेको छ । प्ले अफको झिनो अंक गणितीय आसा रहेको चितवनले बाँकी दुई खेलमा जादुमय प्रर्दशन गर्न सके र विराटनगर र काठमाडौंको नतिजा आफु अनुकुल आउन सके अघिल्लो चरण प्रवेश गर्न सक्छ ।

दुवै खेलमा झिनो अन्तरले जित निकाले प्ले अफको लागि पर्याप्त हुने छैन । अघिल्लो चरणको यात्रा तय गर्न चितवनले बाँकी दुई खेलमा चमत्कार प्रर्दशन गर्नैपर्छ । साथै अन्य टोलीको नतिजा आफु अनुकुल आए नेट रन रेटमा चितवनको भविष्य चम्किन सक्छ । चितवन पोखरा र विराटनगरसँग खेल्न बाँकी रहेको छ ।

पहिलो खेलमा ललितपुसँग ११ रनले पराजित भएको चितवन दोस्रो खेलमा काठमाडौंसँग ६ विकेट र भैरहवासँग १२ रनले पराजित भएको थियो ।

पोखरा राइनोज

पहिलो खेलमा २ सय १६ रन भैरहवासँग बचाउन नसक्नु पोखराको लागि दुर्भाग्य रहयो । पोखराको प्ले अफको झिनो अंकगणीतिय संभावना रहेको छ । पोखराले चितवन र काठमाडौंसँग खेल्न बाँकी रहेको छ । यी दुवै खेलमा स्पष्ट फराकिलो जित निकाल्न सके, काठमाडौं र विराटनगरको नजिता आफु अनुकुल आउन सके अघिल्लो चरणको झिनो अंकगाणीतिय आसा कायमै देखिन्छ ।

पोखरा पहिलो खेलमा भैरहवासँग ६ विकेट ,विराटनगरसँग सुपर ओभरमा ७ रन र ललितपुरसँग ८ विकेटले पराजित भएको थियो ।