काठमाडौं – तेस्रो संस्करणको टिभीएस एभरेष्ट प्रिमियर लिग (ईपीएल) मा आज एक खेल मात्र हुने छ ।

समूह चरणको १४ औं खेलमा ज्ञानेन्द्र मल्लले सम्हालेको ललितपुर प्याट्रीयट्सले शरद भेषावकरले कप्तानी गरि गरेको भैरहवा ग्ल्याडीयटर्ससँग खेल्ने छ । खेल दिउँसो १ बजेबाट टीयू क्रिकेट मैदानमा सुरु हुने छ । यी दुई टोलीलाई उपाधिको प्रमुख दाबेदारको रुपमा पनि हेरिएको छ ।

भैरहवा र ललितपुर दुवै टोली समान चार खेलमा समान तीन जित र एक हारका साथ प्ले अफमा पुगि सकेका छन् । अंक तालिकामा शिर्ष स्थानमा रहने सपना सहित दुबै टोली मैदान प्रवेश गर्ने छन् । समान ६ अंक भएपनि नेट रनरेटका आधारमा ललितपुर शीर्ष, भैरहवा दोस्रो र काठमाडौं तेस्रो स्थानमा छन् । ललितपुर र भैरहवाको समुह चरणको आजको खेल अन्तिम हो भने काठमाडौंले एक खेल खेल्न बाँकी छ ।

भैरहवाले पहिलो खेलमा पोखरा राइनोजलाई ४ विकेटले पराजित गर्दा दोस्रो खेलमा चितवन टाइगर्सलाई १२ रनले हराएको थियो । तेस्रो खेलमा विराटनगरलाई ४ विकेटले पराजित गर्दै प्ले अफमा पुगेको भैरहवा चौथो खेलमा भने काठमाडौंसँग ७ विकेकटले पराजित हुन पुग्यो । नेदरल्यान्ड्सका रायन टेन डेस्काटे, यूएईका तीब्र गतिका बलर मोेहमम्द नविद, भारतीय ब्याट्सम्यान रवि इन्दर सिंह भैरहवाका प्रमुख हरियार र जारी ईपीएलमा उत्कृष्ट प्रर्दशन गरि रहेका खेलाडी हुन् ।

पहिलो खेलमा विराटनगरसँग ३ विकेटले पराजित भएको ललितपुरले दोस्रो खेलमा चितवन टाइगर्सलाई ११ रनले पराजित गरेको थियो । तेस्रो खेलमा पोखरा राइनोजलाई ८ र चौथो खेलमा काठमाडौंलाई १० विकेटको फराकिलो अन्तरले पराजित गर्दै प्ले अफमा आफ्नो स्थान पक्का गरेको थियो । गौरव तोमर,जयकिशन कोल्सावाला र सन्नी पटेल ललितपुरका प्रमुख खेलाडी हुन् ।

शीर्ष स्थानमा रहँदा के हुन्छ ?

ललितपुर र भैरहवा आजको खेलमा जित निकाल्दै शिर्ष स्थानमा रहेर प्ले अफमा पुग्न चाहान्छन् । समुह चरणको दुई खेल हुन बाँकी रहँदा एक टोलीको प्ले अफको टुङ्गो लाग्न बाँकी छ । काठमाडौं, ललितपुर र भैरहवा प्ले अफमा पुग्दा र चितवन र विराटनगर मध्य एक पुग्ने छन् । सोमबार हुने काठमाडौं र विराटनगरको खेल पछि टुङ्गो लाग्ने छ ।

शिर्ष स्थानमा रहेका दुई टोलीले पहिलो क्वालिफायर १८ डिसेम्बरमा खेल्ने छन् । विजेता सोझै फाइनलमा प्रवेश गर्दा पराजित हुने टोलीले तेस्रो र चौथो स्थानबीचको विजेतासँग पुन २० डिसेम्बरमा क्वालिफायर खेल खेल्न पाउछ । विजेता टोलीले पहिलो क्वालिफायरको विजेतासँग उपाधिको लागि २२ डिसेम्बरमा खेल्ने छ ।