काठमाडौं (हाम्रो खेलकुद)-आसन्न आइसीसी महिला एसिया छनोट–२०१९ का लागि नेपाली महिला राष्ट्रिय क्रिकेट टिमको बन्द प्रशिक्षण आउदो बुधबारदेखि हुने भएको छ । नेपाल क्रिकेट टिमका व्यवस्थापक रमन शिवाकोटीले जारी गरेको प्रेस विज्ञप्ति अनुसार नेपाली महिला टिमले बुधबारदेखि प्रशिक्षण थाल्ने उल्लेख गरेको छ ।
यही प्रशिक्षण पछि नेपाली महिला क्रिकेट टिमले थाइल्यान्डमा अर्काे महिना आयोजना हुने थाइल्यान्ड महिला टी–२० स्मास २०१९ मा सहभागिता जनाउनेछ । थाइल्यान्ड क्रिकेट एसोसिएसनको आयोजनामा हुने प्रतियोगिता जनवरी १२ देखि १८ तारिखसम्म हुनेछ । यस प्रतियोगितामा नेपालसहित भुटान, हङकङ इन्डोनेसिया, मलेसिया, तान्जिनिया, थाइल्यान्ड, एसएल नाभी, कुवेत र नामिवियाको सहभागिता रहेको छ ।
थाइल्यान्ड महिला टी–२० स्मासमा नेपालले १२ जनवरीमा तान्जिनियाविरुद्ध खेल्दै प्रतियोगिताको सुरुवात गर्नेछ । त्यसपछि १४ जनवरीमा नामिवियासँग खेल्नेछ । १५ जनवरीमा इन्डोनेसिया र १६ जनवरीमा कुवेतसँग खेल्नेछ । यो प्रतियोगितालाई आइसीसी महिला एसिया छनोट–२०१९ को छनोट प्रतियोगताको रुपमा हेरिएको छ ।
आइसीसी महिला एसिया छनोट थाइल्यान्डमै फेब्रुअरी १८ बाट २७ तारिखसम्म हुनेछ । छनोटमा चीन, हङकङ, कुवेत, मलेसिया, थाइल्यान्ड, युएईं र नेपालको सहभागिा रहेको छ । प्रतियोगिता राउन्ड रोविन लिगको आधारमा हुनेछ ।
छनोटको विजेताले २०१९ मा आयोजना हुने आइसीसी महिला टी–२० विश्वकपको छनोट र २०२० मा आयोजना हुने आइसीसी महिला क्रिकेट विश्वकपमा सहभागिताको अवसर पाउनेछ । नेपाली महिला खेलाडीहरुले प्रतियोगिता नजिकिसक्दा पनि प्रशिक्षणको वातावरण नबनेको भन्दै गुनासो पोखिरहेका थिए ।
