काठमाडौं (हाम्रो खेलकुद) – सुशील कोइराला मेमोरियल फाउन्डेसनले तीन युवा क्रिकेटरलाई प्रशिक्षणका लागि छात्रवृत्तिमा भारत पठाउने भएको छ । यी खेलाडीले नयाँ दिल्ली स्थित दिग्गज खेलाडी वीरेन्द्र सेहवागद्वारा स्थापित सेहवाग क्रिकेट एकेडेमीमा प्रशिक्षण गर्नेछन ।

नेपालका लागि उमेर समूहमा खेलिसकेका ऋत गौतम र तृतराज दाससंगै भुपेन्द्र कुमार उप्रेतीले प्रशिक्षण कार्यक्रममा सहभागिता जनाउने छन् । ऋत र तृत यसअघि यू-१६ उमेर समूहमा खेलिसकेका छन् भने भुपेन्द्र भर्खरै क्रिकेट सुरु गरेका हुन् । उनलाई नयाँ खेलाडीका रुपमा प्रशिक्षण क्याम्पमा सहभागी गराइएको हो । तीनै खेलाडी बिहिबार त्यसतर्फ प्रस्थान गर्नेछन् ।

एक महिने प्रशिक्षण क्याम्पमा एकेडेमीले पनि छात्रवृति प्रदान गरेको छ । छात्रवृत्ति बाहेकको सम्पूर्ण खर्च सुशील कोइराला मेमोरियल फाउन्डेसनले व्यहोर्ने छ । फाउन्डेसनले यस कार्यक्रमलाई वार्षिक रुपमा निरन्तरता दिने पनि बताएको छ  । छात्रवृत्तिको नाम ‘एस.के.एम.एफ क्रिकेट स्कलरसीप’ रहने जानकारी दिइयो ।

यू-१९ टोलीका प्रशिक्षक विनोद दासले यी दुई खेलाडी उमेर समूहमा राम्रो प्रदर्शन गरेका हुनाले निकै आशा राखिएको बताए । ‘ दुवै खेलाडीले उमेर समूहमा राम्रो प्रदर्शन गरेका छन् । अब हामीले केहि महिनामा यू-१९ विश्वकप छनोट पनि खेल्दैछौं । यस प्रशिक्षणले खेलाडीको विकासमा सहयोग पुग्नेछ,’ उनले भने ।

फाउन्डेसनका सदस्य सचिव अतुल कोइरालाले खेलाडीहरुले भारतमा गर्ने तालिम तथा अनुभवले यी तीन किशोरको खेल तथा जीवनमा सकारात्मक असर पुर्याउने कुरामा विश्वस्त रहेको बताए । सहभागीमध्येका ऋत गौतमले पनि यस प्रशिक्षणले आफ्नो खेल विकासमा सहयोग पुग्ने बताए ।