काठमाडौं (हाम्रो खेलकुद) – योगेन्द्र सिंह कार्कीले अन्तिम ४ बलमा लगातर २-२ रन जोड्दै आठ रन जोडेपछि ललितपुर प्याट्रीयट्सले काठमाडौं किंग्स इलेभेनलाई १ विकेटले पराजित गर्दै एभरेस्ट प्रिमियर लिगको फाइनलमा स्थान पक्का गरेको छ । काठमाडौंले प्रस्तुत गरेको १ सय ९ रनको लक्ष्य ललितपुरले अन्तिम बलमा भेटेको थियो ।

ललितपुरको जितमा नायक सावित रहेका योगेन्द्रले २९ बलमा १ चौका सहित २८ रनमा नट आउट रहे । १ सय ९ रनको सामान्य लक्ष्य पक्ष्याएको ललितपुरको सुरुवात भने राम्रो हुन सकेन । पहिलो ओभरको चार बलमै १ रन मा गौरव तोमरलाई गुमाएको ललितपुरले चौथो ओभरको पहिलो बलमा अर्का ओपनर जयकिशन कोल्सावाला ७ रनमा आउट हुन पुगे । तोमरलाई केभिन ओ ब्राएनले रोहन मुस्तफाको हातबाट क्याच गराउदा कोल्सावालालाई मुस्तफाले बोल्ड आउट गरेका हुन् ।

त्यस्तै आठौं ओभरको पाँचौ बलमा सांसद शेखले कप्तान ज्ञानेन्द्र मल्ललाई २१ रनमा एलपि डब्लू आउट गर्दै पेभिलिएको बाटो देखाएपछि ललितपुर केहि दबाबमा देखिएको थियो । मल्लले २२ बलमा ४ चौका प्रहार गरे । ११ ओभरमा ललितपुरको नाटकीय रुपमा विकेट पतन भयो । ११ औं ओभरको पहिलो बलमा प्रदीप साहुले सागर पुनको हातबाट क्याच गराउदैं पवन सरार्फलाई १९ रनमा आउट गरे ।

त्यसै ओभरको तेस्रो बलमा सन्दीप जोरा र चौथो बलमा सन्नी पटेललाई साहुले डक आउट गरेपछि ललितपुर संकटमा परेको थियो । पवनले २२ बलमा समान एक चौका र छक्का प्रहार गरे । सातौं विकेटका लागि कुशल भुर्तेल र योगेन्द्रसिंह कार्कीले ३७ रनको साझेदारी मुस्तफाले तोडेपछि ललितपुरलाई झनै कठिन बनेको थियो । कुशलले २७ बलमा २ चौका र १ छक्का प्रहार गर्दै २९ रन बनाए । कुशललाई १८ औं ओभरको दोस्रो बलमा मुस्तफाले अंमरसिंह राउटेलाको हातबाट क्याच आउट गराएका थिए ।

काठमाडौंका लागि भारतीय बलर प्रदीप साहुले ४ ओभरमा १ मेडन सहित ११ रन खर्चेर ३ विकेट लिए पनि टोलीको हार टार्न सकेनन् । त्यस्तै रोहन मुस्तफा र केभिन ओ ब्राएनले समान दुई विकेट लिदा सांसद शेखले विकेट लिए । बुधबार भैरहवा ग्ल्याडीयटर्स र चितवनबीच एलिनेमिटर खेल हुने छ । एलिनिमेटरको विजेता टोली काठमाडौंसँग क्वालिफायर खेल्ने छ । क्वालिफायरबाट विजेता टोली ललितपुरसँग उपाधिको लागि फाइनल खेल खेल्ने छ ।

त्यसअघि टस हारेर पहिला ब्याटिङ थालेको काठमाडौंले १९.५ ओभरमा सबै विकेट गुमाएर १ सय ८ रन मात्र बनाउन सक्यो । मध्यम सुरुवात गरेको काठमाडौंले चौथो ओभरको चौथो बलमा पवन सर्राफले सन्दीप जोराको हाटबाट क्याच गराउदैं ओपनर अमित श्रेष्ठलाई ९ रनमा आउट गर्दै ललितपुरलाई पहिलो सफलता दिलाए । दोस्रो विकेटका लागि सागर पुन र कप्तान रोहन मुस्तफाले ३८ रनको साझेदारी गर्दै काठमाडौंलाई ठूलो स्कोर तर्फ बढाउन खोजेका थिए ।

तर सातौं ओभरको चौथो बलमा रोहन मुस्तफालाई कुशल भुर्तेलले उत्कृष्ट रन आउट गर्दै पाट्नरशिप तोडे र ललितपुरलाई खेलमा फर्काए । मुस्तफाले २० बलमा ३ चौका र २ छक्का प्रहार गर्दै ३२ रनमा आउट भए । लगत्तै ७.४ ओभरमा ललित नारायण राजवंशीले केभिन ओ ब्राएनलाई विकेटकिपर जय किशन कोल्सावालाको हातबाट एक रनमा आउट गरेपछि काठमाडौं दवावमा परेको थियो । १० औं ओभरको पहिलो बलमा नरेश बुढाएरलाई १ र त्यसै ओभरको अन्तिम बलमा राजु रिजाललाइ पवन सर्राफले डक आउट गरेपछि काठमाडौं ठूलो स्कोर बनाउनबाट चुकेको हो ।

छैटौं विकेटका लागि सिद्धान्त लोहनी र सागर पुनले २४ रनको साझेदारी गर्दै सम्मानजनक स्थितीसम्म पुर्याउने आसा देखाएका थिए । तर सन्नी पटेलले सिद्धान्तलाई १६ ओभरको तेस्रो बलमा बोल्ड आउट गरेपछि काठमाडौं पूर्ण रुपमा धरासय बनेको हो । लोहनीले २४ बलमा २ चौका सहित १६ रन बनाए ।

काठमाडौंको विकेट पतन निरन्तर जारी रह्यो । सागर पुनले ३० बलमा समान एक चौका र छक्का सहित २९, प्रदीप साहु ९, बिक्रम शुषाल २,जितेन्द्र मुखिया डक र सांसद शेख ३ रनमा नट आउट रहे । काठमाडौंलाई सस्तैमा रोक्न पवन सर्राफले कसिलो बलिङ गरे । पवनले ४ ओभरमा १ मेडन सहित १३ रन खचेर ३ विकेट लिए । योगेन्द्रसिंह कार्कीले पनि २.५ ओभरमा १८ रन खर्चेर ३ विकेट लिए । त्यस्तै सन्नी पटेल २ र ललित नारायण राजवंशी को नाममा पनि एक विकेट रह्यो । प्रतियोगितामा पहिलो खेल खेलिरहेका युवा स्पिनर सूर्य तामाङले पनि ४ ओभरमा १७ रनमात्र खर्चे ।