काठमाडौं (हाम्रो खेलकुद) – भैरहवा ग्ल्याडीयटर्स एभरेष्ट प्रिमियर लिगमा चितवन टाइगर्सलाई ४ विकेटले पराजित गर्दै क्वालिफायरमा प्रवेश गरेको छ ।

चितवनले प्रस्तुत गरेको १ सय ४० रनको लक्ष्य पछ्याएको भैरहवाले १८.२ ओभरमा ६ विकेटको क्षतिमा १ सय ४२ रन बनाउदै पुरा गर्दै क्वालिफायरमा काठमाडौं किंग्स इलाभनेसँगको भेट पक्का गरेको हो । पहिलो क्वालिफायर खेलमा काठमाडौंलाई १ विकेटले पराजित गर्दै ललितपुर फाइनलमा पुगि सकेको छ । बिहीबार भैरहवा र काठमाडौँ भिड्ने छन् । विजेता टोली उपाधिको लागि ललितपुरसँग आगमी शनिबार खेल्ने छ । यो हारसँगै चितवन इपीएलबाट बाहिरीएको छ ।

भैरहवाको जितमा कुशल मल्ल र रोहित कुमार पौडेलले अन्तिममा उत्कृष्ट ब्याटिङ गर्दै सहज जित दिलाए । सातौ विकेटका लागि रोहत र मल्लले ४ ओभर भित्र ५१ रनको अविजीत साझेदारी गर्दै भैरहवालाई सहज जित दिलाए । रोहितले १४ बलमा २ चौका र १ छक्का प्रहार गर्दै २४ रन बनाए । त्यस्तै मल्लले १३ बलमा समान दुई चौका र छक्का प्रहार गर्दै २७ रनमा नट आउट रहे ।

मध्यम लक्ष्य पक्ष्याएको भैरहवाले सुरुवाती ५ ओभरमा प्रमुख ३ ब्याट्सम्यानलाई गुमाउनु पर्यो । ललितसिंह भण्डारीले दोस्रो ओभरको पाँचौ बलमा भिम सार्कीको हातबाट क्याच गराउदै मोहम्मद नविदलाई ४ रनमा पेभिलिएनको बाटो देखाए । नविद आउट भएको एक ओभरपछि कमलसिंह ऐरीले रविइन्दर सिंहलाई ४ रनमा आउट गरे । सिंह विकेटकीपर जोन सिप्पसनको हातबाट क्याच आउट हुन पुगे । पाँचौ ओभरको पहिलो बलमा कमलले दिपेन्द्रको हातबाट क्याच गराउदै रायन टेन डेस्काटेलाई डक आउट पठाएपछि भैरहवा सुरुवाती समय दबाबमा परेको थियो ।

तर चौथो विकेटका लागि कप्तान शरद भेषवाकर र प्रदीप ऐरीले ५६ रनको साझेदारी गर्दै भैरहवालाई जिततर्फ अग्रसर लगे । यी दुईको पाट्नरशिप १२.२ ओभरमा प्रदीपलाई ४२ रनमा विकेटकीपर सिम्पसनको हाटबाट क्याच गराउदैँ कमलले तोडेका थिए । प्रदीपले ३८ बलमा ६ चौका प्रहार गरे । १३.४ ओभरमा दिपेन्द्रले पृथु वास्कोटाको हातबाट क्याच गराउदै शरदलाई २९ रनमा आउट गरेपछि चितवन खेलमा फर्किएको थियो । शरदले २७ बलमा ३ चौका प्रहार गरे । लगत्तै अर्को ओभरमा आरिफ ६ रनमा रन आउट भए । कमलसिंह ऐरीले ४ ओभरमा २६ रन खर्चेर ३ विकेट लिए पनि टोलीको हार र्टान सकेनन् । ललित र दिपेन्द्रले समान एक विकेट लिए ।

त्यस अघि टस हारेर पहिला ब्याटिङ थालेको चितवनले दिपेन्द्र सिंह ऐरीको अर्ध शतकको सहयोगमा निर्धारित २० ओभरमा ८ विकेटको क्षतिमा १ सय ३९ रन बनाएको थियो । १८.५ ओभरमा मोहम्मद नविदले कृष्ण कार्कीको हातबाट क्याच आउट गराउनु अघि दिपेन्द्रले ४५ बलमा ६ चौका र १ छक्का प्रहार गर्दै ५६ रन जोडे ।

चितवनका ओपनर तथा टपअडर ब्याट्सम्यान आज पनि चल्न सकेनन् । चितवनले १८ रन बनाउदा दोस्रो ओभरको पाँचौ बलमा सन्दीप सुनार ब्यक्तिगत ४ रनमा आउट भए । सुनारलाई रायन टेन डेस्काटेले अभिनाश बोहराको हातबाट क्याच गराए । लगत्तै तेस्रो ओभरको पहिलो बलमा पाउल स्टरलिङ १४ रनमा आउट भए । मोहम्मद नवीदको ओभरमा कुशल मल्लले क्याच गर्नु अघि स्टरलिङले ७ बलमा २ चौका र १ छक्का प्रहार गरे ।

पाँचौ ओभरको तेस्रो बलमा नविदलेनै कप्तान शरद भेषवाकरको हातबाट क्याच गर्दै पृथु बास्कोटालाई डक आउट पेभिलिएन फर्कापछि चितवन दबाबमा पर्यो । चितवनको विकेट पतन एक तर्फबाट जारी रह्यो भने अर्को तर्फबाट दिपेन्द्रले रन बनाई रहे । ९ औँ ओभरको अन्तिम बलमा जोन सिम्पसनलाई भुवन कार्कीले डेस्काटेको हातबाट १४ रनमा क्याच आउट गर्दिए । १२ औं ओभरको चौथो बलमा अभिनाशले भिम सार्कीलाई ९ रनममा एलबीडब्लू आउट गरेपछि चितवनले थप दवावमा खेप्नु पर्यो । दिपेन्द्रले चितवनको पाली समाली रहे । दिपेन्द्र बाहेक चितवनका जर्ज स्कट ९,कमल सिंह ऐरी १३ र ललित सिंह भण्डारी ४ रनमा नट आउट रहे ।

भैरहवाका लागि मोहम्मद नविदले ४ ओभरमा २४ रन खर्चेर ३ विकेट लिए । धारिलो बलिङ गरेका अभिनाश बोहराले ४ ओभरमा १३ रन खर्चेर २ विकेट लिदा रायन टेन डेस्काटेले,भुवन काकी र कृष्ण कार्कीको नाममा पनि एक विकेट रह्यो ।