काठमाडौं (हाम्रो खेलकुद) – काठमाडौं किंग्स इलेभेनलाई ६ विकेटले पराजित गर्दै भैरहवा ग्ल्याडीयटर्स एभरेस्ट प्रिमियर लिग (ईपीएल) को फाइनलमा प्रवेश गरेको छ ।

शनिबार हुने फाइनलमा भैरहवाले ललितपुर प्याट्रीयट्सको सामना गर्नेछ । यसअघि पहिलो क्वालिफायर खेलमा काठमाडौंलाई १ विकेटले पराजित गर्दै ललितपुर फाइनलमा पुगि सकेको छ । ललितपुर र भैरहवा उपाधिको लागि आगमी शनिबार खेल्ने छन् । यो हारसँगै काठमाडौं ईपीएलबाट बाहिरीएको छ ।

काठमाडौंले प्रस्तुत गरेको १ सय १ रनको लक्ष्य भैरहवाले १७ ओभरमा ४ विकेट गुमाउँदै प्राप्त गरेको हो । भैरहवाको जितमा रायन टेन डेस्काटेले उत्कृष्ट ब्याटिङ गरे । १२.३ ओभरमा प्रदीप साहुले सांसद शेखको हातबाट क्याच गराउनु अघि डेस्काटेले ३८ बलमा ५ चौका प्रहार गर्दै ४५ रन बनाए ।

त्यस्तै रविइन्दर सिंहले १९ बलमा ३ चौका र १ छक्का प्रहार गर्दै ३१ रनमा आउट भए । रविइन्दर सिंहलाई १४.५ ओभरमा सांसद शेखले सिद्धान्तको हातबाट क्याच गराए । पहिलो विकेटका रुपमा तेस्रो ओभरमा अन्तिम बलमा ओपनर प्रदीप ऐरीलाई ३ रनमा भैरहवाले गुमाएको थियो । प्रदीपलाई सिद्धान्त लोहनीले रन आउट गराए ।

रायन टेन डोस्काटे

दोस्रो विकेटका रुपमा आरिफ शेख ५ रनमा आउट भए । आरिफलाई ७.४ ओभरमा सांसद शेखले एलपी डब्लू आउट गरे । शरद भेषवाकर ६ र रोहित कुमार पौडेल ९ रनमा नट आउट रहे । सांसद शेखले ४ ओभरमा ३० रन खर्चेर २ विकेट लिएपनि टोलीको हार टार्न सकेनन् । त्यस्तै प्रदीप साहुले १ विकेट लिन बाहेक अन्य कुनै पनि बलरले विकेट लिन सकेनन् ।

त्यस अघि टियु क्रिकेट मैदानमा टस हारेर पहिला ब्याटिङ थालेको काठमाडौंले अन्तिम ओभरमा अल आउट हुदैँ १ सय रनमा समेटियो । काठमाडौंका लागि ८ ब्याट्सम्यानले दोहोरो अंकमा रन छुन सकेनन् । काठमाडौंले पहिलो विकेटका रुपमा छैटौ ओभरको तेस्रो बलमा रोहन मुस्तफालाई ६ रनमा गुमाएको थियो । मुस्तफालाई कप्तान शरद भेषवाकरले बोल्ड गरे ।

मुस्तफा आउट भएसँगै काठमाडौंको लगातार विकेट पतन गुमि रह्यो । सातौ ओभरको दोस्रो बलमा नरेश बुढाएर २ र तेस्रो बलमा केभिन ओ ब्राइन डक आउट हुन पुगे । कुशल मल्लले नरेशलाई बोल्ड र ब्राइनलाई आरिफ शेखको हातबाट क्याच गराए । ११ ओभरको दोस्रो बलमा मल्ललेनै ओपनर अमित श्रेष्ठलाई रोहित कुमार पौडेलको हातबाट क्याच गराउदै १३ रनमा पेभिलिएनको बाटो देखाएपछि भैरहवा खेलमा हाबी रह्यो । अमितले ३२ बलमा १ चौका प्रहार सहित १३ रन बनाए ।

पाँचौ विकेटका लागि प्रदीप साहु र सन्दीप रजालीले ३३ रनको सोझेदारी गर्दै काठमाडौंलाई सम्मानजनक लक्ष्यको आसा देखाएका थिए । तर अभिनाश बोहराले १५ ओभरको अन्तिम बलमा रायन टेन डेस्काटेको हातबाट क्याच गराउदैँ साहुलाई २५ रनमा आउट गरेपछि काठमाडौं सस्तैमा समेटियो । साहुले २२ बलमा ३ चौका प्रहार गरे ।

डेब्यू गरेका सन्दीप रजाली १८.४ ओभरमा अभिनश बोहराले रन आउट गनु अघि २६ बलमा समान १ चौका र छक्का प्रहार गर्दै २७ रन बनाए । सोमपाल कामी ७, राजु रिजाल १,जितेन्द्र मुखिया २ र सिद्धान्त लोहनी ४ रनमा नट आउट रहे । भैरहवाका लागि युवा खेलाडी कुशल मल्लले ४ ओभर २० रन खर्चेर ३ विकेट लिए । त्यस्तै युएईका तीब्र गतिका बलर मोहम्मद नविदले २, शरद भेषवाकर र अभिनाश बोहराको नाममा पनि एक विकेट रह्यो ।