काठमाडौं – नेपाली क्रिकेट टिमका अलराउण्डर सागर पुन चोटका कारण कम्तिमा ४ महिना मैदान बाहिर रहने भएका छन् ।

बुधबार एभरेष्ट प्रिमियर लिग (र्इपीएल) मा ललितपुरसँग कालिफायर खेलको दौरानमा सागरको दाइने खुट्टाको एंकलमा समस्या देखिएपछि मैदान छाडेका थिए । सागरलाई बिहिवार मेडिसिटी हस्पीटलमा भर्ना गरिएको र डाक्टरको सल्लाह अनुसार खुट्टाको अप्रेशन गरेको सागरका बुवा कुलेन्द्रले हाम्रो खेलकुदलाई जानकारी दिए ।

सागरको बुबाका अनुसार सागरको विहिवार (हिजो) १० : ३० मा दायाँ खुट्टाको अप्रेशन गरिएको थियो । साथै सागर सोमबारभित्र अस्पतालबाट डिसचार्ज हुने छन् । एक महिनापछि पुन: डाक्टरलाई देखाएपछि मात्र सागर कति महिनापछि खेलमा फर्किन सक्ने भन्ने थाहा सागरका बुबाले जानकारी दिए । सागरका बुबाले हाम्रो खेलकुदलाई दिएको जानकारी अनुसार कम्तिमा पनि सागर ४ महिना मैदान बाहिर रहने छन् ।

काठमाडौँ र ललितपुरबीचको क्वालिफायरमा बुधबार सागर १६ औ ओभरमा बलिङ गर्न आएका थिए । १६ औँ ओभरको पाँचौ बल गर्ने क्रममा सागरको खुट्टामा समस्या देखिएको थियो र सागरको बाँकी दुई बल जितेन्द्र मुखियाले गरेका थिए । उक्त खेलमा काठमाडौंलाई १ विकेटले हराउँदै ललितपुर फाइनलमा पुगेको थियो ।