काठमाडौं (हाम्रो खेलकुद) – घरेलु क्रिकेटका तीन ठूला टि ट्वान्टी प्रतियोगितामध्ये एभरेष्ट प्रिमियर लिग (ईपीएल) को २०१८ संस्करणको उपाधि ज्ञानेन्द्र मल्लको कप्तानीमा रहेको ललितपुर प्याट्रियट्सले पहिलो पटक जितेको छ ।
उपाधि विजेता ललितपुर प्याट्रीयट्स
कीर्तिपुरस्थित त्रिभुवन विश्वविद्यालयको मैदानमा शरद भेषावकरको भैरहवा ग्ल्याडियटर्सलाई १४ रनले हराउँदै ललितपुरले इपिएल उपाधि जितेको हो । अन्य दुई प्रतियोगिता धनगढी प्रिमियर लिग (डीपीएल) र पोखरा प्रिमियर लिग (पिपिएल) मा ज्ञानेन्द्रको कप्तानीमा रहेको टोलीले जितेको छैन । ज्ञानेन्द्रले ईपीएलको पहिलो संस्करण (कलर्स एक्स फ्याक्टर) र डीपीएलको पछिल्लो संस्करण (काठमाडौं गोल्डेन्स) लाई फाइनलमा पुर्याएपनि उपाधि जित्न भने सकेका थिएनन् ।
पहिलो पटक च्याम्पियन बनेपछि ज्ञानेन्द्रले आफ्नो टोली उपाधिको हकदार रहेको बताए । उनले भने , ‘हामीलाई अघिल्लो वर्षपनि सम्भावित विजेताका रुपमा हेरिएको थियो । तर, सफल भएनौं । यसपटक सुरुवात राम्रो भएन । तर त्यसपछि सबैले आफ्नो जिम्मेवारी निर्वाह गर्दै अघि बढ्यौं र सफलता मिल्यो ।’
ज्ञानेन्द्रले फाइनलमा १ सय ५६ रनको सामान्य लक्ष्य दिएपनि भैरहवाका रवि इन्दर सिंहको विकेट लिनु नै महत्वपूर्ण भएको बताए । ‘ रविलाई आउट गरेपछि हामीले खेल आफ्नो पक्षमा पार्यौं,’ ज्ञानेन्द्रले आफ्नो टोलीको इनिङका बारेमा भने, ‘ आफ्नो ब्याटिङमा फिनिसङ गर्न सकेनौं । खेललाई अन्तिम ओभरसम्म पुर्याउन नसक्नुले लक्ष्य केहि कम भएको थियो । अन्तिम केहि ओभरमा लगातार विकेट खस्दा २० देखि २५ रन कम भएको महसुस गरेको थिएँ ।
ज्ञानेन्द्रले दोस्रो इनिङसमा सबैले राम्रो खेल्दा जित हात पार्न सकेको बताए । ‘ राम्रो सुरुवात गर्न सके खेलमा फर्कन सक्ने विश्वास थियो । । रविको विकेट गएपछि हामीले खेलमा पकड बनायौं र अन्त्यसम्म सबैले आफ्नो जिम्मेवारी पूरा गर्दै जितसम्म डोर्याए,’ उनले टुंग्याए ।
