काठमाडौं (हाम्रो खेलकुद) – नेपाली युवा स्पिनर सन्दिप लामिछाने र ब्याट्सम्यान पिटर ह्यान्ड्सकम्बको उत्कृष्ट प्रदर्शनमा मेलवर्न स्टार्सले विग ब्यास लिगमा पहिलो जित निकालेको छ ।
बिहीबार सिड्नी सिक्सर्सलाई ५ विकेटले हराउँदै पहिलो जित निकालेको हो । १ सय ३१ रनको लक्ष्य पक्ष्याएको मेलबर्नले पिटर हृयान्डस्कम्बको अर्धशतकमा १४.५ ओभरमा ५ विकेटको क्षतिमा सहजै पुरा गर्यो । मेलवर्नलाई सहज जिताउन ह्यान्ड्सकम्बले ३५ बलमा ९ चौका र ३ छक्का प्रहार गर्दै ७० रन बनाए ।
कप्तान ग्लेन म्याक्सवेल ८, मार्कस स्टोइनिस १०, निक लार्किनले २० र ड्वेन ब्राभ्रो ९ रनको योगदान दिए । सिक्सर्सका बेन ड्वार्सियसले ३ र स्टिभ ओ’कीफले दुई विकेट लिएपनि टोलीको हार टार्न सकेनन् ।
त्यसअघि टस हारेर पहिला ब्याटिङ थालेको सिक्सर्सले सन्दीप लामिछानेको घातक बलिङमा २० ओभरमा ९ विकेट गुमाउँदै १ सय ३० रनमा समेटिएको थियो । सिड्नीका सन एबोट २२, जोर्डन सिल्क ४१, ड्यानियल ह्युज्स २० र जो डेनलीले १४ रन बनाउन बाहेक अन्य कुनैपनि ब्याट्सम्यानले राम्रो प्रर्दशन गर्न सकेनन् । मेलवर्नका लागि ज्याक्स कोलमनले ३, सन्दीप लामिछाने र ड्वेन ब्राभ्रोले समान दुई विकेट लिए । त्यस्तै एडम जम्पा र ग्लेन म्यासवेलको नाममा पनि समान एक विकेट रह्यो । सन्दीपले ४ ओभरमा १८ रन खर्चिएका थिए ।
पहिलो खेलमा सिड्नी थन्डरसँग १५ रनले पराजित भएको मेलवर्न दोस्रो खेलमा होबार्ट हरिकेन्ससँग ६ विकेटले पराजित भएको थियो । सन्दीपको टिम मेलवर्नले मंगलबार मेलबर्न रेनेगेड्ससँग खेल्नेछ ।
