काठमाडौं (हाम्रो खेलकुद) – नेपाली राष्ट्रिय टोलीका उप–कप्तान ज्ञानेन्द्र मल्लले सञ्चालन गरेको काठमाडौं क्रिकेट ट्रेनिङ सेन्टर (केसिटिसी) ले आफ्नो स्थापनाको दशौं वर्षको अवसरमा विभिन्न खेलाडीहरुलाई सम्मानित गरेको छ ।

केसीटिसीले शनिबार राजधानीमा एक कार्यक्रमबीच केसीटिसीबाट क्रिकेट करियर सुरु गरेका यु–१६, यु–१९, राष्ट्रिय टोली तथा महिला राष्ट्रिय टोलीमा नेपालको प्रतिनिधित्व गर्ने खेलाडीहरुलाई सम्मानित गरेको थियो । त्यस्तै केसिटिसीले स्थापना देखि हालसम्म सहयोग गर्ने विभिन्न व्यक्तित्वहरुलाई पनि सोही अवसरमा सम्मान गरेको थियो । उनीहरुलाई ललितपुर महानगरपालिकाका मेयर चिरीबाबु महर्जन, सञ्चालक ज्ञानेन्द्र मल्ल लगायतले सम्मानित गरे ।

केसीटिसीका सञ्चालक तथा नेपाली राष्ट्रिय टोलीका उपकप्तान ज्ञानेन्द्र मल्लले आफ्नो इच्छा नहुँदै स्थापना भएको केसीटिसीको दशौं  वर्षमा प्रवेश गरेको खुशीयाली मनाउन पाउँदा गर्वको विषय रहेको बताए । ‘केसीटिसी सञ्चालन गर्ने मेरो इच्छा थिएन । फाउन्डर चियरम्यान रवि दाईको चाहनामा केसीटिसी स्थापना भएको हो । वहाँलाई आफ्नो छोरालाई क्रिकेटर बनाउने चाहना रहेछ,’ सञ्चालक मल्लले भने, ‘उहाँले पछि आफ्नै लागि पनि राम्रो हुन्छ, स्थापना गर्दा केही फरक पर्दैन भन्नुभएको थियो । त्यसैले स्थापना गर्ने जमर्काे गरेका थियौं । अहिले १० वर्षमा प्रवेश गरेको छ । कति छिट्टै १० वर्ष पुगे जस्तो लाग्छ ।’

काठमाडौंमा क्रिकेट कल्चर नभएको अवस्थामा केसीटिसीको स्थापनाले विस्तारै क्रिकेट कल्चर बसाएको बताए । ‘केसीटिसीबाट धेरै राम्रा खेलाडीहरु उत्पादन भएको छ । ८–१० जना राष्ट्रिय टिमबाटै प्रतिनिधित्व गर्न सक्ने प्रतिभावान खेलाडीहरु छन्,’ मल्लले भने, ‘यो सुरुवात हो । गर्न धेरै बाँकी छ । क्रिकेट कल्चर नभएको अवस्थामा केसीटिसीले क्रिकेट खेल्न र सिक्न चाहनेलाई प्लेटफर्म दिएको छ ।’

मल्लले सुरुको ५ वर्ष केसीटिसी चलाउन निकै गाह्रो भएर बन्द हुने अवस्थामा पुगेपनि पछिल्लो समय सञ्चालन गर्न सहज हुदै गएको बताए । ‘सुरुवात चुनौतीपूर्ण रहेको थियो । अहिले राम्रो हुदै आएको छ । क्रिकेटमा कन्ट्रिब्युसन गर्न पाएको छु । यसमै खुशी छु,’ ज्ञानेन्द्रले भने, ‘१० वर्षको अवधिमा १ हजार भन्दा बढिले यहाँबाट केही न केही सिकेर गएका छन् । अहिले सेसन अनुसार हुदा १ सय भन्दा बढी नियमित प्रशिक्षण गरिहेका छन् ।’ उनले केसीटिसीको विस्तारै एकेडेमीको अवधारणमा जाने लक्ष्य रहको योजना सुनाए ।