एजेन्सी (सिड्नी)– चेतेश्वर पुजाराले करिअरको १८ औं शतक प्रहार गरेपछि अष्ट्रेलियासँगको चौथो तथा अन्तिम टेस्टको पहिलो दिनमै भारत विशाल योगफल तर्फ बढेको छ ।

सिड्नीमा पहिलो दिनको खेल सकिँदा टस जितेर ब्याटिङ थालेको भारतले ९० ओभरमा ३ सय ३ रन बनाउन ४ विकेट गुमाएको छ । उस्का लागि पुजारा २ सय ५० बलमा १६ चौका प्रहार गर्दै १ सय ३० रनमा नट आउट छन् । पुजारालाई हनुमा बिहारीले ३९ रन बनाई साथ दिएका छन् ।

त्यसअघि ओपनर युवा खेलाडी मयंक अग्रवालले उत्कृष्ट ब्याटिङ गर्दै ७७ रन बनाएपछि भारतले राम्रो सुरुवात पाएको थियो । अग्रवालले १ सय १२ बलमा ७ चौका र २ छक्का प्रहार गरे । त्यस्तै कप्तान विराट कोहलीले २३,अजिंक्या रहाणे १८ र केएल राहुल ९ रनमा पेभिलिएन फर्के । अष्ट्रेलियाका लागि जोश हेजलवुडले दुई,मिचेल स्टार्क र लाथन लायनले समान एक विकेट लिन बाहेक अन्य कुनै पनि बलरले विकेट लिन सकेनन् ।

चार टेस्टको श्रृंखलामा भारत २–१ को अग्रतामा छ । पहिलो टेस्टमा भारत ३१ रनले विजयी हुँदा दोस्रोमा १ सय ४६ रनले पराजित भयो । तेस्रो टेस्टमा भारत १ सय ३७ रनले भएपछि पहिलो पटक अष्ट्रेलियन भूमिमा टेस्ट सिरीज जित्ने आसा पलाएको हो । भारतले चौथो टेस्टमा जित वा ड्र गराए पहिलो पटक अष्ट्रेलियन भूमिमा टेस्ट सिरीज जित्ने छ ।