एजेन्सी – अस्ट्रेलियासँग पहिलो वान डे खेल खेल्नु अघि भारतीय क्रिकेट टिमलाई ठूलो धक्का लागेको छ । एक टेलिभिजन कार्यक्रममा महिलामाथि आपत्तिजनक शब्द प्रयोग गरेको भन्दै अलराउण्डर हार्दिक पान्ड्या र ओपनर केएल राहुललाई पहिलो वान डे खेलको लागि भारतीय क्रिकेट बोर्ड (बिसिसिआई) ले निलम्बित गरेको बुझिएको छ ।
पछिल्लो केहि दिनयता निकै विवादमा रहेका पान्ड्या र राहुलसँग बिसिसिआईले स्पष्टीकरण समेत मागेको थियो । बिसिसिआई प्रशासन समिति एक सदस्य डायना एडुल्जीका अनुसार यी दुबै खेलाडीलाई पहिलो वान डे खेलको लागि टोलीबाट बाहिर राखिएको छ । यद्यपी अन्य खेल खेलमा टिम बाहिर राख्ने वा नराख्ने भन्ने विसिसिआईले निर्णय गर्न बाँकी रहेको छ ।
भारतीय संचारमाध्यमका अनुसार पान्ड्या र राहुललाई दुई खेल प्रतिबन्ध लाग्न सक्ने उच्च संभावना रहेको छ । मिडिल तथा फिनिसर कमजोर देखी रहेको भारतीय टोलीको लागि पान्ड्या टिम बाहिर रहनु घातक सावित हुन सक्ने छ । भारत र अस्ट्रेलियाबीचको पहिलो वान डे खेल शनिवार सिड्नीमा हुँदै छ ।
त्यस्तै घरेलु टोली अस्ट्रेलियाले प्लेइङ ११ को घोषणा गरेको छ । घोषणा गरेको टिममा पिटर सिडलले ८ वर्षपछि टोलीमा कमब्याक गरेका छन् । सिडल सन् २०१० मा श्रींलकासँगको खेल पछि बल्ल टिममा मौका पाएका हुन् ।
अस्ट्रेलियाको टिम :
आरोन फिन्च (कप्तान), एलेक्स केरी, उस्मान खवाजा, शन मार्श, पीटर ह्यान्ड्सकम्ब, मार्कस स्टोइनिस, ग्लेन मैक्सवेल, नाथन लायन, पीटर सिडल, झाई रिचर्डसन, जेसन बेहरेनड्रॉफ
