एजेन्सी – युवा अलराउण्डर शुभमन गिल र विजय शंकरले भारतीय सिमित ओभरको खेलमा मौका पाएका छन् । भारतीय क्रिकेट बोर्ड (बिसिसिआई)ले अस्ट्रेलियासँगको दुई वान डे तथा न्युजिल्यान्डसँग हुने ५ वान डे र ३ टी-२० सिरीजको लागि गिल र शंकरलाई टिममा स्थान दिएको छ ।

एक टेलिभिजन कार्यक्रममा महिलामाथि आपत्तिजनक शब्द प्रयोग गरेको भन्दै अलराउण्डर हार्दिक पान्ड्या र केएल राहुल निलम्बनमा परेपछि यी दुई खेलाडीको स्थानमा गिल र शंकरले मौका पाएका हुन् । निलम्बनसँगै पान्ड्या र राहुल भारत फर्किसकेका छन् । यी दुई खेलाडीमाथि छानबिन भई रहेको छ । छानबिन समय सम्म दुवै खेलाडी टिम बाहिर रहने बिसिसिआईले जनाएको छ ।

भारतलाई यू-१९ विश्वकप जिताउन महत्वपूर्ण प्रर्दशन गरेका गिलले पञ्जाबबाट रणजी ट्रफीमा सानदार प्रर्दशन गरेका छन् । मात्र १० इनिङसमा २ शतक र ५ अर्धशतक प्रहार गर्दै ९८.७५ को औसतमा कुल ७ सय ९० रन बनाएका छन् । राहुलको स्थानमा गिलले पहिलो पटक सिनियर टिममा मौका पाएका हुन् ।

२७ वर्षिय अलराउण्डर विजयी शंकरले भारतीय टिमबाट टी-२० खेली सकेका छन् । शंकरले सन् २०१८ मार्च मा श्रीलंकासँग खेल्दै भारतबाट टी२० खेलमा डेब्यू गरेका थिए । वान डे खेलमा भने पहिलो पटक मौका पाएका हुन् । पान्ड्याको स्थानमा शंकरले लिएका हुन् ।

शंकरले मिडियम पेश बलिङसँगै भारतीय ए र प्रथम श्रेणीमा तल्लो क्रममा ब्याटिङ गर्ने गर्दछन् । शंकरले प्रथम श्रेणीमा ५३ पालीमा ५ शतक र १५ अर्ध शतक प्रहार गर्दै कुल २०९९ रन बनाएका छन् । त्यस्तै ४१ खेलमा शंकरले प्रथम श्रेणीमा ३२ विकेट लिएका छन् ।