सुनसरी (हाम्रो खेलकुद)– सुनसरीको इनरुवामा जारी मनमोहन स्मृति एक दिवसीय राष्ट्रिय क्रिकेट प्रतियोगिताको सेमिफाइनल समिकरण पुरा भएको छ । पहिलो सेमिफाइनल खेलमा विहिबार प्रदेश ७ ले नेपाल पुलिसको सामना गर्ने छ। त्यस्तै दोस्रो सेमिफाइनलमा नेपाल आर्मी र प्रदेश १ बीच शुक्रबार प्रतिसप्रर्धा हुने छ ।
बुधबार भएको खेलमा प्रदेश ७ भारतीय क्लव सुफलसँग १ विकेटले पराजित भएको थियो । प्रदेश ७ झिनो अन्तरले पराजितका बाबजुद नेट रनरेटका आधारमा प्रदेश ५ र सुफललाई पछिपार्दै पुलिससँगको भेट पक्का गरेको हो ।
१ सय ८५ रनको लक्ष्य पक्ष्याएको सुफलले ३८ ओभरमा ९ विकेटको क्षतिमा १ सय ८८ रन बनाउदै लक्ष्य पुरा गर्यो । सुफलको जितमा सौरभ गिली ४३,अजय २८,एमडी इशा २३ र सुमित मिश्रले २० रन जोडे ।
सुफलका तीन ब्याट्सम्यानले खाता खोल्न सकेनन् । प्रदेश ७ का लागि शेर मल्ले १० ओभरमा ५३ रन खर्चेर ४ विकेट लिए । त्यस्तै बिनोद लामा ३,विकाश र नारायण जोशीले समान एक विकेट लिए ।
त्यस अघि टस जितेर पहिला ब्याटिङ थालेको प्रदेश ७ ले ४२ ओभरमा अल आउट हुँदै १ सय ८४ रनमा समेटियो । उस्का लागि विपिन राउवल ५३,रोशन अधिकारी २५,लोकेश बम २२ र नारायण जोशीले २१ रन बनाउन बाहेक अन्यले खासै राम्रो प्रर्दशन गर्न सकेनन् । सुफलका लागि विश्वजित सिंहले ४,राजा २,इन्द्रजित,राजेश सिंह र सुमित मिश्रले समान एक विकेट हात पारे ।
विजेताले उपाधिसंगै ४ लाख १ हजार नगद पुरस्कार पाउने छ । उपविजेताले २ लाख १ हजार तथा सेमिफाइनलमा पुग्ने टोलीले २५र२५ हजार पाउने छन् ।
प्रतियोगिताको उत्कृष्ट खेलाडीले ५१ हजार प्राप्त गर्दा उत्कृष्ट बलर र ब्याट्सम्यानले २० हजार १ सय नगद पुरस्कार पाउने छन् । त्यस्तै अनुशाषित टिमले १५ हजार र उदयमान टिमले १० हजार नगद पाउने छन् ।
