सुनसरी (हाम्रो खेलकुद) – दिलीप नाथको शतक र सागर ढकालले घातक बलिङबाट प्रेरिस नेपाल पुलिस क्लब सुनसरीको इनरुवामा जारी मनमोहन स्मृति एक दिवसीय राष्ट्रिय क्रिकेट प्रतियोगिताको फाइनलमा पुगेको छ ।
बिहीबार प्रदेश ७ लाई २ सय रनको फराकिलो अन्तरले पराजित हराउँदै पुलिस उपाधि नजिक पुगेको हो । ३ सय २४ रनको लक्ष्य पछ्याएको प्रदेश टोली ३१.१ ओभरमा सबै विकेट गुमाएर मात्र १ सय २३ रनमा समेटियो ।
प्रदेश ७ का लागि विपिन रावल र लोकश बमले समान २६ रन बनाए । नारायण जोशी र नरेन्द्र साउदले समान १६ रन बनाउन बाहेक अन्य कुनै पनि ब्याट्सम्यानले दोहोरो अंकमा रन बनाउन सकेनन् ।
विपक्षीलाई सस्तैमा समेट्ने क्रममा पुलिसका युवा स्पिनर सागर ढकालले ९.३ ओभरमा दुई मेडन सहित ३१ रन खर्चेर ५ विकेट लिए । त्यस्तै नवीन थापा र रामनरेश गिरीले समान २ तथा सुनिल धमलाले १ विकेट लिए ।
त्यसअघि टस जितेर पहिला ब्याटिङ गरेको पुलिसले दीलिप नाथको शतकमा निर्धारित ५० ओभरमा ८ विकेटको क्षतिमा ३ सय २३ रनको विशाल योगफल तयार पारेको थियो । १ सय २५ बल खेलेका दीलिप ९ चौका र ५ छक्का प्रहार गर्दै १ सय १६ रनमा अविजित रहे । मञ्जित श्रेष्ठ ५३,कुशल भुत्तेल २७,योगेन्द्र कार्की २५,प्रेम तामाङ २४ रन जोडे ।
त्यस्तै अमित श्रेष्ठ ११,सुनिल धमला १० र दिपेश श्रेष्ठले १२ रन बटुले । प्रदेश ७ का लागि विकास आगरीले ३,विनोद लामा २,लोकेश बम,नरेन्द्र साउद र शेर मल्लले समान १ विकेट लिए । त्रिभुवन आर्मी क्लब र प्रदेश १ बीच शुक्रबार दोस्रो सेमिफाइनल हुनेछ । त्यो खेलको विजेताले पुलिससँग शनिबार फाइनल खेल्नेछ ।
